Qallunaat sakkutuuisa filmiliarineqarsimanerat aalassatsitsivoq
Filmimi piviusulersaarummi Armadillomi qallunaat Afghanistanimi sakkutuui aatsaat taama qanillineqartigipput. Filmiliortut sorsuffimmiipput filmiliuummillu niaqorornaveeqqummi inissitamik filmiliorlutik. Qallunaat sakkutuui talibaninik eqqaassisut malittaraavut, taakkua qaartartoq igeriuttagaq miloriuppaat kingornalu talibanit toqorarlugit.
Sakkutuut inuusuttut marluk pinngitsuussuserminnik sapangiisut malittaraavut filmimilu ilitsersuisup Janus Schmidtip oqarneratut:
- Imaannaanngitsorujussuuvoq, naakkittaatsuliornerujussuuvoq.
Silarsuarmi matoqqasumi inuusoqarsinnaagami? TV-aviisimimi takusarpavut inunnik tuusintilinnik toqusoqartuaannartoq, filmimi taama oqartoqarpallappoq.
DR-imi ukiorpassuarni illersornissaq pillugu sulisuusimasup Peter Skautrupip matumani filmi qallunaat Afghanistanimi suliaat pillugit qanoq sunniuteqassanersoq naliliivoq:
- Maanna oqallisigineqalereerpoq qallunaat sakkutuuisa sorsunneqartillugu inatsit unioqqutissimaneraat, tamatumanimi apeqqutaammat toqoraaneq. Imaassinnaavoq kukkusumik iliorsimasut, taavalu sakkutuuinnaat maani peqataaniarlutik angersimallutik imminnullu takutittut pineqaatissinneqartariaqarput taavalu imminnut aperisariaqalerlutik, qanoruna kukkusumik iliorsimasugut?
Kinguneqartitsisoqassappat qanoq pisoqarumaarnersoq aperineqarami akivoq:
- Paasisakka naapertorlugit illersornissakkut unnerluussisussaatitaasut misissuinerat aallartinneqassaaq, misissorneqarlunilu immaqa pisussaanngikkaluartut pisimanersut, filmimi takugaanni sakkutuup tanngassimaarutigigaa magasin ulikkaartoq imaarsimallugu akeqqaminut nalareersumut, Peter Skautrup Kaj Sellikenimut oqarpoq. DR taama ilanngutassiivoq.
