Qallunaat sakkutuui qullersaminninngaanniit oqaaseqaqqunagit naalakkerneqarput
Tamanna Qallunaat Nunaanni sakkutuut marluk kinaanerminnik isertuusserusuttut uppernarsarpaat.
- Tusagassiuutitigut naalakkiummik nalunaarfigineqarpugut piviusulersaarut Amadillo akuerineqartinnata oqaaseqarfigissanngikkipput, sakkutooq kinaanerminik isertuusserusuttoq ilaatigut oqarpoq.
Filmimi piviusulersaarummi Armadillomi qallunaat Afghanistanimi sakkutuui, aatsaat taama qanillineqartigipput.
Filmiliortut sorsuffimmiipput filmiliuummillu niaqorornaveeqqummi inissitamik filmiliarineqarlutik.
Qallunaat sakkutuui talibaninik eqqaassisut malittarineqarput, taakkua qaartartoq igeriuttagaq miloriuppaat kingornalu talibanit toqorarlugit.
DRip ilanngutassiaa malillugu DR-imi ukiorpassuarni illersornissaq pillugu sulisuusimasup Peter Skautrupip filmi qallunaat Afghanistanimi suliaat Danmarkip avammut isigineqarneranut innarliisussaasoq isumaqarpoq, tamannalu pissutaagunarpoq qallunaat sakkutuuisa piviusulersaarut pillugu oqaaseqaqqusaajunnaarnerannut.
Piviusulersaarut aatsaat aasaru Danmarkimi takutinneqartaqattaassaaq. Nunatsinni takutinneqarsinnaanissaa Katuap filmertarfiani ingerlatsisup Ove Heilmannip ilimaginngilaa piviusulersaarutit filminut allanut sanilliullugit siammarterneqartarneri annikinneralaarsuummata.
