Qallunaat puallariartuinnarput

Danmarkimi angutit pualavallaat ukiut 20-t kingulliit ingerlaneranni marloriaammik amerlisimapput arnallu pualavallaat sisamariaammik amerlisimallutik.
decembarip 13-at 2010 08:55

Rockwool Fondenip 2009-mi misissuinerani ilaqutariit 4.000-t angissusaat oqimaassusaallu uuttortarneqarput, misissuinerullu inerneri ullumi saqqummiunneqarlutik.

Misissuinermi aqutsisoq Jens Bonke naapertorlugu misissuinermi paasisat aarlerinartortaqarput.

- Inuit arfineq- marluugaangata ataaseq pualavallaartuusartoq kisitsisit takutippaat. Taamaattoq pualavallaat Danmarkimi takussaaleriartornerat europamiut sinnerinut sanilliullugu allaanerunngilaq, Jens Bonke aviisi Berlingske naapertorlugu taama oqarpoq.

Angutit pualavallaat amerlanerugaluartut arnat pualavallaat peqqissutsimikkut aarlerinartorsiornerupput, tassa naakkut orsoqarpallaarneq arnat akornaanni takussaanerusarami.