Qallunaat politikeriisa kalaallit sipaarfigerusunngilaat
Juliane Henningsenip aningaasaliissutigineqartartut ukiunut marlunnut isumaqatiginninniutigineqartarunnaarnissaanut oqarnera Radikale Venstreni isumaginninnermut oqaaseqartartuata, Anne Marie Geislerip isumaqatigaa.
- Isumaqatigiinniartoqarnerani oqaatigaara inunnut sanngiinnerusunut aningaasaliissutigineqartartut siunissami qulakkeerneqartariaqartut, Anne Marie Geisler oqarpoq.
Dansk Folkepartiimiit Kalaallit Nunaannut tunngasunik oqaaseqartartoq Henrik Brodersen oqarpoq, kalaallit angerlarsimaffeqanngitsut ornittagaat sipaarfigineqassappata tamanna kukkunerussasoq. Inunnut sullissineq pingaaruteqarmat sipaartoqannginnissaa iluarineqarpoq.
- Qallunaat akornanni inuiaqatigiinni sanngiinnerusut amerlasoorujussuupput. Kalaallilli ornittagassaminnik amigaateqarput, ilaquttaminnit ungasissorujussuarmiikkamik. Taamaattumik isumaqarpugut kalaallit angerlarsimaffeqanngitsut ornittagaqarnissaat pisariaqarluinnarpoq. Maluginiartarpara angerlarsimaffeqanngitsut ornittagaat ingerlalluartut, taamaammat isumaqarpunga ornittakkat ingerlalluartut matusariaqanngitsut, Dansk Folkepartimiit Henrik Brodersen taama oqarpoq.
