Qallunaat olympiademut piumasaqataat qasukkarneqarput
Ukiukkut olympiademi unamminermi peqataasinnaanissamut qallunaanit piumasaqaatigineqartut qasukkarneqarannut pissutaavoq ujakkaarluni sisortartup Martin Møllerip Torontomi ukiut sisamat siorna unammeqataanngitsoornera, naak olympiademi unammeqataanissamut piumasaqaatinik angusisimagaluarluni.
Olympiademi unammeqataanissamut qallunaat piumasaqaataasa sukannernerunerat Kalaallit Nunaanni taamanikkut aalassassutigineqarpoq. Tamatuma kingorna Danmarkimi timersortartut kattuffiata piumasaqaatigineqartut allanngortippai, nutaarsiassaqartitsivik ritzau taamatut allaaserisaqarpoq.
- Kalaallit tungaannut pisussaaffeqarpugut. Olympiademi unamminissami timersortartumik ataatsimik ilaatitaqarneq inuiaassutsimik misigissutsimut pingaaruteqartorujussuuvoq, Danmarkimi timersortartut kattuffianni Danmarks Idræts Forbundimi siulittaasuusimasoq Kai Holm oqarpoq.
Danmarks Idrætsforbundip siulittaasortaavata olympeadimi unamminissamut peqataasinnaanerup ajornannginnerulersinneqarsimaneranik oqartoqarnera ilumuunnginnerarpaa.
Ukiuunnerani olympeademik unamminermi Canadami Vancouverimi ingerlanneqartussami timersortartut 18-it Danmarki sinnerlugu unammissapput, taakkunani peqataassaaq ooqattaasarluni sisortartoq Øyestein Slettemark.