Qallunaat Nunatsinni aatsitassat pissarsiffigerusuppaat
Naliliisarfimmi pisortaq Jens Jonatan Steen eqqarsaqatigiittarfimmi Cevea-meersoq oqarpoq, inuit isumasiorneqarnerannit paasissutissaq danskit naalakkersuisuinut eqiallaataasussatut isigineqartariaqartoq.
- Pisortat aningaasaliisinnaanerannut periarfissat eqqarsaatigisariaqarpagut. Danskit tungaanit isigalugu danskit qanoq iliuuseqarsimanngillat. Oqaluttuarisaanermi attaveqatigiippugut Kalaallit Nunaannullu pisussaaffeqarluta, Jens Jonatan Steen aviisimi Berlingske-mi taama issuarneqarpoq.
Aatsitassarsioqatigiiffimmi London Mining-imi pisortaanerup Xiaogang Hop apersorneqarnera aviisimi Berlngske-mi allaaserineqarpoq. London Mining Nuup kangerluani suliamik angisuumik aallartitsiniartut siuttuattut taaneqarsinnaavoq.
Nuup Kangerluani saviminissamik piiaanissamik suliniuteqarneq Kina-miunillu aningaasalersorneqartussap danskit tusagassiorfiini isorinnitumik allaaserineqarnera London Mining-ip pisortaaneranit akunnatuungassutigineqarpoq.
- Isorinnippalaartumik allaaserisaqartarneq aningaasaliisinnaasunut isumaqatiginniarnissaq ajornakusoortilersinnaavaat, Xiaogang Ho oqarpoq.
- Danmark periarfissiissutigineqartunut tanngassimaartariaqarpoq, tamannami kalaalli inuunnerannut ajunnginnerusunik kinguneqartussaavoq, Xiaogang Ho oqarpoq.
Aatsitassanut Naalakkersuisuugallartoq Ove Karl Berthelsen oqarpoq, Kalaallit Nunaanni aatsitassanut aningaasaliuumaartussanut Danmark suli inortuinngitsoq, Socialdemokraatilli Kalaallit Nunaat pillugu oqaaseqartartua Flemming Møller oqarpoq, Kalaallit Nunaanni aatsitassanut ingerlatsinermi naalagaaffik peqataasariaqanngitsoq.