Qallunaat naalakkersuisui kalaallit akisussaaffii pillugit akerusunngillat
- Taasineq naammassivoq. 54-it akuersipput, 58-it akerliusut. Taasinngitsoortoqanngilaq. Siunnersuut itigartinneqarpoq.
Kalaallit Nunaannut tunngassuteqartut Namminersorlutik Oqartussat oqartussaaffigisaat pillugit apeqqutinut akissuteqaqqusinani Helle Thorning-Schmidt Folketingimi ullaaq taperserneqarmat tassa taama nipaqarpoq.
Ministeriuneq Folketingip siulittaasuanut januaarip ulluisa 28-anni allagaqarpoq, allakkamini aalajangersumik erseqqissaatigaa, aatsitassat pillugit apeqqutit, apeqqutillu tassunga assingusut, nammineq naalakkersuisumi akinavianngikkaat oqaatigalugu, tamakkumi aalajangersaaffigineqareermata. Illuatungiliuttut tamanna kamaatigeqaat, ippassarlu apeqquteqaateqartoqarmat piumasaralugu allakkat utertinneqassasut.
Naalakkersuisullu isumaat Dansk Folkepartimeersup Søren Espersenip ilaatigut paasiuminaatsippaa.
- Qaasuitsup killeqarfiani qimmit qimuttut, Tasiilami meeqqat kaattut, Nuummilu Ilisimatusarfik tassanilu ilinniagaqartarneq pillugit siusinnerusukkut naalakkersuisunut apeqquteqaateqartarsimavunga. Tamatigullu kusanartumik akineqartarpunga, Naalagaaffeqatigiinnimi taama pssuseqartuaannaratta, Søren Espersen oqarpoq.
Ministeriunerup ulluni kingullerni arlaleriaqaluni erseqqissaatigaa, nammineq isumaqarluni illuatungiliuttut Namminersorlutik Oqartussat isumaqatigiissutaannit, namminneq akuerseqataaffigisaminnit, qimaasut - tassa suliniutit angisuut pillugit inatsimmut akerliunermikkut.
- Taamaammat partiit, Namminersorlutik Oqartussat inatsisaannut taaseqataasut, tamaasa aamma kaammattorpakka tamatuma kingunerisassai paaseqqullugit, pisoq pillugu ippassaq unnukkut isumasioqatigiinnerup kinguninngua ministeriuneq oqarpoq.