Qallunaat naalakkersuisui arferit naalliutsinneqartarnerannik illersuisuupput

Danmark-imi uumasunik illersuiniaqatigiit Dyrenes Beskyttelse kalaallit arfarnniartarnerannut apeqqut pillugu danskit naalakkersuisuinik isornartorsuilerput. Danmark uumasut atugarissaarnissaat pillugu uppernassussini annaassavaa, peqatigiiffigiiffik isumaqarpoq.

Qallunaat naalakkersuisui arferit naalliutsinneqartarannik illersuisuupput kalaallillu nunaata siunissaami periarfissaanik ajoqusiisinnaalluni, Dyrenes Beskyttelse qallunaat naalakkersuisuinut unnerluussipalaartumik nipeqarluni taamatut Ritzauimut oqarput. Isumaqatigiinngissutigineqartumut tunuliaqutaavoq kalaallinut arfattassiissutigineqartussat kikkunnit isumaqatiginniutigineqassanersut, qallunaat naalakkersuisuinit

imaluunniit EU-mit. EU-mi avataangiisit pillugit kommisærip Stavros Dimas-ip siunnersuutiginikuuvaa, Danmark taamatulu EU-imi nunat ilaasortat Arfanniarneq pillugu ataatsimiititaliarsuaq IWC majimi Alaska-mi ataatsimiinerani EU-p arfattassat pillugu isumaqatiginniarsinnaatitaaneq tigussagaa.

Tamannali danmark-ip statsministeriata Anders Fogh Rasmussen-ip itigartitsissutiginikuuvaa, nalaagaaaffeqatigiinnerup iluani soqutisat innersuussutigalugit.

EU-ip iluani arfanniartarneq pillugu isummernera , Danmark-imilu naalakkersuisuit kisimiillutik isummersimanerat akunnakusooruteqarpoq, uumasunik illersuiniaqatigiit Dyrenes Beskyttelse-p direktøria Ole Munster præsedentialu Arne Stevns nunanut allanut ministereqarfimmut allagaqarnerminni taamatut allapput. Nunat EU-mi ilaasortat allat arfanniarneq ajorput nioqqutissiassatullu siunertaqarluni arfanniartarnerup inerteqqutaatinneqarnera atuutiinnarniarlugu, akerlianillu Danmark killilimmik arfanniarsinnaaneq tapersersorlugu soorlu nungutaasinnaasutut ulorianartorsiortinneqanngitsunik tikaagullinniarsinaaneq tapersersorneqarluni. Uumasunik illersuiniaqatigiit isumaqarput, savalimmiormiut kalaallillu soqutigiisaat EU-mit ingerlanneqarsinnaalluarnerarpaat, EU-mi ataatsimoortumik isummersimaneq aporfiginngikkaluarlugu. Pisortaq præsedent-ilu ilanngullugu allapput, qallunaat naalakkersuisui nunani EU-imi ilaasortanit tatiginanngitsutut isigineqassasut, kalaallillu arfanniartarnerat japan-imiut tunisassiaralugu arfanniartarerannut assersuunneqassammat, tamannalu uumasunik naalliutitsisarnertut sanilliunneqarlutik.