Qallunaat kalaallillu arferit pillugit isumaqatigiikkunnaarput
Imarpiup Atlantikup kujasissuani arfernik eqqissisimatitsivissamik pilersitsisoqarnissaa Brasiliap kissaatigaa, aamma Japanip kissaatigalugu Japanimi sinerissani sisamani inuiaqatigiinnguit tikaagullinnik 200-nik-250-inilluunniit ukiumut pisassinneqartalernissaat akuersissutigisariaqartoq.
Arfanniartarneq pillugu Danmarkimi kommissærip, Ole Samsingip, oqarnera naapertorlugu, siunnersuutit taakku marluk Arfanniarneq pillugu ataatsimiititaliarsuup ataatsimiinnerani puffatsitsissaqaat, naak una ataatsimeersuarnissaq, ukiuni siusinnerusuni ataatsimiittarnernut naleqqiullugu, eqqissisimanerusussatut ilimagineqareeraluartoq.
- Ataatsimiinnerit kingulliit marluk-pingasut assut pissanganartorsiorfiusarsimapput, Kalaallit Nunaatami qipoqqartassinneqaqqittalernissaa Danmarkip sakkortuumik taamani ilungersuutigaa, qulingiluanillumi qipoqqartassinneqarnermik aamma kinguneqarpoq, Ole Samsing oqarpoq.
Kalaallit Nunaanni arfanniartarnerup, EU-milu, oqimaaqatigiissaarinissaa ajornakusooqisoq Arfanniarneq pillugu ataatsimiititaliarsuarmut Danmarkimi naalakkersuisut ukiorpassuarni anguniarsimavaat, arfanniarnermi EU-mit akerlerineqartorujussuuvoq.
Imarpissuulli Atlantikup kujasissuani arfernik eqqissisimatitsivissamik Brasiliap siunnersuutaa Danmarkimit taperserniarneqarpoq, naak Kalaallit Nunaat Savalimmiullu akerliugaluartut, Ole Samsing oqarpoq.
- Siunnersuut Folketingimi 2008-mi qaqinneqarmat aalassassutaalaarpoq, Kalaallit Nunaammi Savalimmiullu taamani isumaqarput, tamanna isumassarsiatsialaanngitsoq. Sulilumi taama isumaqartut, Ole Samsingip nassuerutigaa.