Qallunaartaq ukiunik 200-nik pisoqaassusulik katersugaasivimmukaanneqassaaq

Alersitoqarsuarmik atukkiussiniarluni Danmarkip Savalimmiut neriorsorsimavai.

Alerseq taanna eqqaavimmi marramerngit aseqqukut eqqakkallu allat nalinginnaasut akornanniissimavoq, ukiut kingulliit 200-t, Savalimmiunili Nationalmuseumi maajimi saqqummersitsilerpat alerseq taanna ataqqinartumik ilumoorsaartumillu saqqummersinneqassaaq. Danmarkimi aviisi, Berlingske Tidende, taama allaaserisaqarpoq.

Alerserligooq taanna nalinginnaanngilluinnarpoq, naak immaqa isigassunnikkaluarluni. Tassaavormigooq savalimmiormiut qallunaartaat, seeqqut tikillugit takitigisoq, taannalugooq 1700-kkut qiteqqunneranneersuugunarpoq. Qallunaartaq taanna Nyhavnimi unnuisarfiit ilaata, maanna Admiral Hoteliusup, kiileriani assaanermi 1970-kkunni nassaarineqarpoq. 1600-kkunni 1700-kkunilu kunngip piumasarisimavaa, savalimmiormiut ukiut tamaasa aalajangersimasumik amerlassusilinnik qallunaartaliortassasut, taakkulu Danmarkimut nassiullugit, Københavnimi katersugaasivimmi pisortaq, Lene Høst-Madsen, oqaluttuarpoq.

Savalimmiuni silap pissusia peqqutigalugu tamaani annoraaminernik nuersakkanillu toqqortaqarniarneq ajornakusoortarpoq, taamaammat savalimmiormiut namminneq takutissinnaasaminnik qallunaartaqanngillat.

Torshavnimi katersugaasiviup pisortaa, Andreas Mortensen, Københavnimut sisamanngorpat tikissaaq, qallunaartarlu tunniunneqassaaq. Qallunaartaq nutaanngitsoq piinnarlugu aqqut sivisugaluaqaaq, kisianni tassa katersugaasivimmiut iluatissartaqigamik.