Qallunaarpassuit H1N1-mik eqqugaareerput
Sulinngiffeqareernerup kingornagut Danmarkimi tunillatsissimasut amerlanerpaalerunik 1,5 millioniussasut, nappaatinut virusinut ilisimatuup aviisimi B.T.-mi siulittuutigaa.
Inuit nunanit allanit tikeralerpata, ukialeqqaarnerani Danmark eqqugaanerpaassaaq. Tamatumani inuit nunani allani feeriarnerminni tunillatsissimanissaat naatsorsuutigalugu taama isummerpunga. Nunammi amerlasuut qallunaat feeriarfigerusuttagaat - soorlu Tuluit Nunaat, USA aamma nunat kujasinnerusuniittut - nappaammit eqqugaasimaqimmata, taama oqarpoq ilisimatooq Jens Lundgreen, Rigshospitalimi, Københavnillu universitetiani peqqinnissamik ilinniarfimmi atorfilik.
USA-mi tunillatsissimasut 33.000-iunerarneqarput - Tuluit Nunaanni 7.500-t innartinneqareerput, aammattaarli feeriartarfiit soorlu Cypern, Spania, New Zealand, Australia aamma Thailand tunillaassuuffiupput. Danmarkimi tunillatsissimasut ippassaq 69-iunerarneqarput - amerlanerunissaalli naatsorsuutigineqarluni, tassami tunillatsissimasut ilaasa suli nakorsiarsimannginnissaat naatsorsuutigineqarmat.