Qallunaaq professori eqqissisaavoq

Cairn Energy isumalluarpallaartariaqanngitsoq qallunaaq immikkut paasisimasalik isumaqarpoq.
aggustip 24-at 2010 12:24

Gassimik nassaartoqareersorlu Cairn Energy Qeqertarsuup kitaani qillerinermini uuliamik nassaarnissaminut isumalluarpoq.

Gassimik nassaartoqarnera Skotlandimiut uuliasiortitseqatigiiffiata Cairn Energyp nalunaaquttap akunneri marluk qaangiuttut ukiup affaanoortumik naatsorsuutini saqqummiummagit immikkoortut pingaarnerit ilagaat.

Cairnip pisortaata tullia Mike Watts nassuiaavoq uuliasortitseqatigiiffiup umiarsuaata qilleriviup Kalaallit Nunaata canadallu akornanni Baffinnip kangerliumarnaniittup sioqqat saattut gassitallit kulbrinteqarneranik malunnaatillit naammattoorsimagai.

- Naak gassi pinngitsoorani uuliaqarfimminngaanneersuusariaqanngikkaluartoq Cairnimi siulersuisut ullumikkut isumalluartorujussuupput.

Tamannali annertuumik tunngavissaqanngitsoq professor Erling Stenby Danmarks Tekniske Universitetimi uumaatsulerinermik ilinniarfimmeersoq oqarpoq.

- Qillerinermi tassani uuliamik nassaartoqarsimanersoq uuliaqarneranulluunniit qularnaatsumik takussutissaqarnersoq inerniliisoqarsinnaanngilaq. Kalaallit Nunaanni nunami uulia qaarsukkut seerisoq siornatigut takuneqartareerpoq, tamannaagunarporlu ullumi ataatsimiinnermi Cairnip isumalluarnertut uteqattaarineranut tunngaviusoq, Erling Stenby oqarpoq.

Tassalu nassaarinerarneqartut sinnersimaneraat aperineqarami ima akivoq:

- Aap, nassaarineqartut sinnerlugit, tassami qaleriissiternerit gassitallit nassaarineqarsimapput iluanaarniutigissallugit amigartut, Erling Stenby oqarpoq.

Uuliamik ujarlerluni qillerinermi sioqqani saattuni gasseqartarnera tupinnartuunngilaq, Erling Stenby oqarpoq.

- Tamanna nalinginnaangaatsiarpoq annertuumillu uuliaqarsinnaaneranut uuttuutaasinnaanani, kisiannili uuliaqarsinnaanera ilimanaateqarpoq ujarleqqinnissarlu pingaaruteqarluni, Erling Stenby naggasiivoq.