Qallunaaq nakorsaq: Kalaallit issi akiorsinnaaneruaat
- Assimi uani takusinnaavarput qeqertarsuup tunuani piniartoq sikut akornanniittoq, assillu aappaaniippoq piniartoq Sjællandip avannaani Gillelejemiittoq, takusinnaasatsitut atisaat assigiipput. Stig Andersen, Ålborg Universitetshospitalimeersoq taama oqarpoq.
Kalaallit, assersuutigalugu danskinut naleqqiullutik, issimik sapigaqannginnerunerat uppersarsimavaa. Kalaallit timiminni orsumik issimut akiuussutissaqarnerat tamatumunnga pissutaavoq. Orsorlu issimut akiuussutissartalik piniartunut pingaaruteqartupilussuuvoq. Taannami pissutigalugu ukioq kaajallallugu ullup ilarujussua qiianatik silamiissinnaapput.
- Ukiuunerata qiteqqunnerani ullormut nalunaaquttap akunneri qulit angullugit silamiissinnaasarput, taamaammat orsoq issimut akiuussutissartalik pisariaqartippaat.
Orsoq issimut akiuussutissartalik nakorsap danskip inuunini tamaat soqutigisarisimavaa. Misissuinerminilu ukiut ingerlanerini ilaatigut Nuuk, Tasiilaq, Tiniteqilaaq, Sermiligaaq, Kulusuk Kuummiullu tikittarsimavai.
Inuiaqatigiinni nutaaliaasuni inuit atisanik illunillu oqorsaasersortuupput silamiikkaangamillu sivisuallaartarani. Inuit issimit sunnerneqaraangamik inussani isikkanilu taqaaqqat qumariartulersarput timillu kiassusaa appartarluni. Tamannalu pissutigalugu inuup timaata kissaliornerata misissornissaa ajornakusoortuuvoq.
- Taamaammat inunnik inunnguuseralugu issimit sunnigaasartunik nassaartariaqarpugut.
Inersimasut orsumik issimut akiuussutissartalimmik pigisaqarnerat 2003-mi nalaatsornerinnakkut paasineqarpoq. Tamanna tikillugu nakorsat silarsuaanni naalungiarsuit tallimanik ulloqalernissamik tungaanut orsumik issimut akiuussutissartalimmik pigisaqarnerat paasineqarsimavoq.
Orsoq timip issimut akiuussutissartalik, tassa timitta kissaliortua, timitsinni sianiutit adrenalinimit sunnerneqaraangata, issimit aallartinneqartarpoq. Orsulli issimut akiuussutissartallip issi atornagu aallartinneqarsinnaanera paasineqarsinnaappat, tamanna iluaqutissartalimmik atorneqarsinnaavoq.
- Taamaaliornikkummi nunarsuarmi pualanerup nappaalassutigineqarnera akiorniarneqarsinnaalissaaq.
Iisartaganngortinneqarsinnaanersoq matumani soqutiginarpoq, nakorsaq Stig Andersen oqarpoq.
Aamma saniatigut iluaqutissartarisinnaasaa tassaavoq orsoq issimut akiuussutissartalik nerinerunngikkaluarluni aallartinneqarsinnaanera, taava nalaasaarfimmi issiaannarluni sanigorsertoqarsinnaassagaluarmat.
Orsoq issimut akiuussutissartalik tartut, tartup sanilequtaani, taqarsuaq atuarlugu, qungatsimi sakissallu qeqqata tungaani nassaassaavoq.
Jette Andersenip ilanngutassiaa Simon Uldumit kalaallisuunngortinneqarpoq.
