Qalipagarsuarnik iluarsartuussisoqarpoq

Nunatsinni qalipaasorsuit ilaata qalipagarpassuinik iluarsartuussisoqarpoq. Emanuel A. Petersenip qalipagarsuinik iluarsartuussineq nunatta katersugaasiviata aanaveersaasarfiani ingerlanneqarluni. Aanaveersaasartut iluarsartuussileruttortut alakkarterpagut.

Emanuel A. Petersenip qalipagarsuinik iluarsatuuttariaqalersimasunik nunatta katersugaasiviani saliinersuaq aallarteruttorpoq. Qalipagarpassuillumi ilaat salinneqareerlutik kusatsilluinnarsimapput. Qalipakkat suminngaanneerpat?

-Qalipakkat Svend Jungep katersugaasivianeersuupput, Takusinnaavarpullu qalipakkat ukiorpassuarni silaannarmi allanngorartumi nivingasimanerat qalipaataannut sunniuteqanngitsoorsimanngitsoq, aanaveersaasartoq Ane Trappendahl oqarpoq. Qalipakkat ilaata qalipaataa katagalersimasoq tinunersaqalersimasorlu takutippaa.

- Qalipakkat taamalisimasut aserfallakkiartornerisa unitsinnissaat uagut suliarisarparput.

- Qalipagarsuit 20-it massakkut suliaraagut, neriuppugullu angumerisinnaasagut amerlanerujumaartut, Emanuel A. Petersenimmi qalipagarsui amerlaqimmata. Oqaatigiuminaapporli. Qalipakkat ilaat, soorlu nikotinimik mingutsinneqarsimasut akunnialuinnaat atorlugit salissinnaasarpagut, ilaalli ullut arlerlugit suliarisaapput, tassa qanoq aserfallassimatigineri apeqqutaasarpoq.

Aanaveersaasut Ane Trappendahl aamma Anne Jensen qaammatini marlunni saliinerminni iluarsartuussinerminnilu akuutissat assigiinngitsut atorpaat qalipaatillu katagarsimagaangata gittimik qalleriarlugit qalipaatip katannikup nalaani qalipaat issuarniavissorlugu ilaartuisarlutik.

Qalipagaateqaruit salittariaqavissorisannik qasorsaasikutsoorlugu nammineerlutit saleqinagu qalipagaq aserussammat, aanaveersaasartumulli salitsiguk, Ane Trappendahl qalipagaatilinnut aamma kaammattuivoq.