Qalipagarsuaq Kalaallit Nunaat kunngissakkunni
Kunngi Frederiup arfineq-pingajuata illussaarsuani 1700-kkunneersumi, eqqumiitsuliortut qallunaat qulit kunngissamut nulianullu tunngassuteqartut aamma inuttut soqutigisaat ilanngullugit saqqummersinniarsimavaat.
Qalipagaq Nunatta assinganik ilalik Kunngissap Frederiup allaffiata, kunnginngoruni ukiortaami oqalugiarfigisartagassaata, silataatungaani utaqqisarfimmi nivingavoq. Taassuminnga qalipaasuuvoq eqqumiitsuliortoq Jesper Christiansen aamma Nunatta assingata saniatigut Danmarkip assinga ilaavoq, qalipakkallu illuatungaani aamma Tasmaniap Australiallu assingi ilaallutik.
- Utaqqisut allaffimmut isertinneqannginnerminni tassani utaqqisassapput. Matumani utaqqisut utaqqinerminni Frederik aamma Mary pillugit paasisaqarnissaat eqqarsaataavoq, Realdaniap pisortaa Hans Peter Svendler Ritzauimut taama oqarpoq. Taassuma suliffeqarfiutaa illussaarsuarmi eqqumiitsuliamut 22 millionit koruuninik tunissuteqarpoq.
Illussaarsuaq arfininngorpamiit tamanit takuniarneqarsinnaalissaaq, taamaalilluni Frederiup Maryllu ukiuunerani illussaarsuassaat qimerloorneqarsinnaassalluni. Illussaarsuup nutarterneqarnera 220 millionit koruuninik akeqarpoq, kunngissakkullu nutarterinermi akuutinneqarput, tassami nutarterinerup nalaani ullut 14-ikkaarlugit qaammatini kingullerni illussaarsuarmut takuniaatinneqartaramik.
