Qalipaasut naalagaata assilisai
Assit katillugit 264-it, Qaqortumi qalipaasut naalagaata soraarninngorsimasup, Carl Høyerip, assilisai, Narsami innuttaasut Illuanni saqqummersinneqarput.
Carl Høyer Qaqortumiinnermini 1950-ikkunniit 1970-ikkut aallartinnerisa tungaanut assiliisarsimavoq.
Narsami Katersugaasivik saqqummersitsinermi aaqqissuisuuvoq, assit Kujataani ulluinnarni inuunermik takutitsipput, innuttaaasullu utoqqaanerusut eqqaasassaqassagunaqaat.
Assinik qanganitsanik Kujataaneersunik saqqummersitsinerup saniatigut aamma assit allat Kujataaneersut, ilaatigut Ove Harderip 1943-miit 1954-ip tungaanut assilisai aamma John Høeghip 1910-miit 1945-p tungaanut assilisai, saqqummersinneqassapput.
Qaqortumi Katersugaasivik saqqummersitsinerni taakkunani pingasuni aaqqissuisuuvoq, saqqummersitsinerillu siullersaat Narsami Innuttaasut Illuanni A-21-mi ullumi takuniarneqarsinnaassaaq.