Qalipaasut misissuiffigineqalerput

maajip 12-at 2005 11:40

Nunatsinni qalipaasut amimikkut anersaartornermikkullu ajoquteqalersarput. Ilaatigut taama oqaasertalimmik qulequtaqarluni, nunatsinni sullivinnik nakkutilliisoqarfik sinerissami qalipaasut sulinerminni atugaannik ukiumi ataatsimi misissuinissaa aallartereerpoq.

Nunatsinni qalipaasut sulinerminni atugaannik misissuinermut atatillugu qalipaasutut sulinermi ilisimasariaqakkat, soorlu amiutit suut peqqissutsimut ulorianartuunersut, sulinermi annertoqartillugu qanoq iliornissat ilaalu ilanngullugit paasisitsiutigineqassapput. Sullivinnik nakkutilliisut taama paasititsiniaajutigalutik misissuilernerat tusarluarnartoq nunatsinni ukiorpaalunngortuni qalipaasutut suliffeqartoq Poul Knudsen Nuummi suliffeqarfimmit O.P. entreprisemeersoq oqarpoq.

- Qalipaasut misissuiffigineqarnissaat assut iluassaaq, tassami maaniinnaanngitsoq sinerissamili sumiiffiit ilaanni amiisut sulinerminni atugaannik pitsanngorsagassaqanngitsoornavianngilaq, Poul Knud oqarpoq. Poul Knudsen qallunaajuvoq, nunatsinni ukiuni 20-ini qalipaasutut sulisimasoq, ullumikkullu Nuummi suliffeqarfimmi O.P entreprisemi qalipaasuulluni. Poul Knudsen-ip nunatsinni qalipaasutut inuussutissarsiuteqarnerup ukiut 20-it ingerlaneranni ineriartorsimanera malinnaaffigilluarsimanerarpaa.

-Maani Nuummi soorlu qalipaasutut sulinermi sillimaniarnikkut malittarisassanik malinnitsitsiniarneq siornanut naleqqiulluni sukannernerujussuarnikuuvoq, taamaalilluni sulinermi pissutsit pitsanngoriarujussuarnikuullutik, Poul Knudsen oqarpoq. Sullivinnik nakkutilliisut misissuinerminnut atatillugu sineriammi illoqarfinnut allanut nalunaaqqaaratik tikittarnissaat pitsaassangaluartoq oqarpoq, Nuummi taamaattoqartarneratigut misilittakkatik eqqarsaatigalugit.

Poul Knudsen oqaluttuarpoq maani qalipaasutut sulileqqaarnermi nalaani qalipaatit toqunartunik akullit atortarsimagaluaritik, atoraangamikkillu silalunnermik merianngunermillu kinguneqartarsimasut. Ullumikkut qalipaatit toqunartunik akoqanngitsut imilertakkat atorneqarnissaat piumasaqaataavoq.

Nunatsinni sulinermut atatillugu ajoqusertarnernik nalunaarutiginnittarnerit manna tikillugu ukiumut naliginnaasumik 25 procentiinnaasarnerat, qalipaasut sulinerminni atugaannut iliuuseqarnissamut aallaavioqataasoq, taama iliuuseqarnermi aqutsisoq Sullivinnik Nakkutilliisoqarfimmeersoq Søren Rasmussen oqarpoq.