Qalipaasut ilinniarsimasut atorneqarlik

Inissiat iluarsaanneqarneranni qalipaasut suliffeqarfiutaat qalipaasunik ilinniarsimasunik sulisullit atorneqartarnissaat, inissiaatileqatigiiffimmut siornatigut piumasaqaatigineqartarsimavoq, immikkoortortaqarfiup pisortaa, Olafur P. Nielsen, Kalaallit Nunaanni Sulisitsisut Peqatigiiffiannut GA-mut taama akissuteqarpoq.

Qalipaasutut ilinniarsimanngitsut sulisinneqartarnerannik ajornartorsiut Ineqarnermut pisortaqarfimmit maanna aaqqiiviginiarneqalerpoq. Suliaq pisortaqarfiup aqutsisoqarfiani eqqartorneqariarluni Kalaallit Nunaanni Sulisitsisut Peqatigiiffiat peqatigalugu aaqqiiffigineqassaaq.

Namminersornerullutik Oqartussat inissiaataasa iluarsaanneqarnerini pitsaanngitsumik sulisoqartartoq pisortaqarfimmit ilisimaneqarpoq.

Kalaallit Nunaanni Sulisitsisut Peqatigiiffiata nittartagaani issuarneqarluni pisortaq erseqqissaavoq, pisortaqarfik arlaleriarluni akuliuttariaqartarsimasoq, qalipariikkat qallerlugit qalipatsittarsimallugit.

Inissiaatileqatigiiffiup qaammatikkuutaartumik ataatsimeeqatigisarnerani, qalipaasunik ilinniarsimasunik qalipaatitsissarnissaa pisortaqarfiup arlaleriarluni piumasarisarsimavaa.