Qalipaasut ilinniarsimanngitsut atorneqarpallaartarput

INI A/S-ip inissiaataanut iserternermi init tamatigorluinnaq qalipanneqartarput.

Imaanngilarli qalipaasut ilinniarsimasut atorneqartuartartut, tamatumalu kinguneraa ilinniarsimasut unammillersinnaajunnaarnerat.

Taama oqarpoq, qalipaasoq namminersortoq, Kristian Kilimi.

- Soorunami ilaanneeriarluta suliarinnittussarsiortoqaraangat neqerooruteqartarpugut, taamaalioraangattalu 8000 koruunit missaanut neqerooruteqartarpugut, kisiannili taava ilinniarsimanngitsut 3000 5000-illu akornannut neqerooruteqartarput, unammillersinnaajunnaavilluta.

Kristian Kilimi, qalipaasoq namminersortoq oqarpoq, qalipaasunik ilinniartitsinermut ernummateqarluni.

- Ilinniarsimasunik atorfeqartitsivugut, massakkullu marlunnik ilinniartoqarlunga, ilinniarsimasummi qalipaasussaapput ilinniarsimanngitsut pinnatik, taamaaginnarpammi qalipaasunik ilinniartoqarneq unitsiinnartariaqarpoq, naggataatigullu ilinniartoqartarneq univilluinnarluni, Kristian Kilimi oqarpoq.

INI A/S-p pisortaa ilanngutassiap suliarinerani oqaaseqartinniarsimagaluarparput iluatitsinatali. Nuummili immikkoortortami pisortaq Susi Kristiansen oqarpoq suliarinnittussatut toqqaanermi suliap pitsaassusaa akia qaqugulu naammassineqarsinnaanera suliamik tunniussinernut tunngaviusartut.