Qalipaasussarsiuineq sukateriffiginiarneqarpoq

INI A/S-ip inissiaataanik qalipaasussarsiuinermi periutsit sukaterniarneqalerput, aaqqissugaanerusunngortinniarneqalerlutik. Ineqarnermut pisortaqarfimmi immikkoortortami pisortaq Olafur P. Nielsen radioavisimut ullumi taama oqarpoq.

Qalipaasut ilinniarsimanngitsut INI A/S-imit qalipaatinneqartarnerat pillugu Ineqarnermut pisortaqarfik iliuuseqarniartoq sapaatiummat saqqummiupparput.

Ineqarnermut pisortaqarfik inissiaatileqatigiiffillu qaammammut ataasiarlutik naapittarput, tullissaanilu ataatsimiittoqalerpat qalipaasussarsiuinermi periutsit sukateriffiginiarneqalerput.

- Qalipaasussarsiuinermi tunngavissat sukaterneqassapput. Assersuutigalugu qalipaasut namminersortut siornatigut suliarisarsimasaat nalilerneqartassapput, atortullu suut atorneqarsimanersut qiviarneqartassallutik, Olafur P. Nielsen oqarpoq, nangillunilu:

- Sulisut ilinniartullu suliffimminni atugarisaat qanoq ittuunersut aamma paaserusuppagut, kiisalu suliffiup aningaasaqarniarnera aamma nalilerneqartassalluni. Tamakku tamaasa ajornartorsiutitaqanngippata aatsaat suliffiutilik pineqartoq Namminersornerullutik Oqartussat inissiaataannik qalipaasussanngortissinnaalissavarput, Olafur Nielsen oqarpoq.

Sulisitsisut Peqatigiiffiat, GA, Ineqarnermullu Pisortaqarfik kattullutik ajornartorsiut aaqqiiviginialerpaat.

Inissiaatileqatigiiffiup qaammatikkuutaartumik ataatsimeeqatigisarnerani, qalipaasunik ilinniarsimasunik qalipaatitsisarnissaa pisortaqarfiup arlaleriarluni piumasarisarsimavaa.