Qalipaasorsuup suliai saqqummersinneqassapput
" Eqqumiitsuliortoq Gitz-Johansen ( 1897-1977) Kalaallit Nunaannik "qalipaaqqullugu" Knud Rasmussenimit suliakkerneqarpoq. 1933-34-mi Maniitsumiinnera eqqumiitsulioriaasianut inuuneratalu sinneranut aalajangiisuulluinnarpoq.
Kalaallit Nunaanniinnermini kalaallit atortuminnik kusassaariaasiat eqqumiitsuliornermini aamma isumassarsiffigisarpaa.
" Kisianni Kalaallit Nunaata 50-ikkunni ineriartornera Gitz-Johansenip akueriuminaatsippaa,tamannalu nunamit qimagunnernaik kinguneqarpoq. Kisianni Kalaallit Nunaat qimareeraluarlugu uummammioraa aamma Kalaallit Nunaata uummammioraa, Atuakkami " ”Arktisk inspiration – Maleren Gitz-Johansen”, Charlotte Christensenimit atuakkiarineqartumi ilaatigut taama allaqqavoq.
Saqqummersitsinermi pinnersaatit Gitz-Johansenimit titartarneqarsimasut Tage Hansen Guldsmediemillu sananeqarsimasut takuneqarsinnaasunut ilaapput.
Københavnimi Kalaallit Illuutaanni saqqummersitsineq novembarip aallaqqaataaniit 13-ata tungaanut takusarneqarsinnaavoq.