Qalipaasoq namminersortoq ukiuni sisamani pinerluuteqarsimasunik inissiisarfimmut

Ikiaroornartoq hash pillugu suliaq annertooq Nunatta eqqartuussiviani ullumi naammassineqarpoq, hashi 29 kiilumit minnerunngitsoq pineqarluni, taama oqaluttuarpoq ikiaroornartoq pillugu politiit immikkoortoqarfianni pinerluttaalisitsisoq, Finn Jeppesen.

Pisoq eqqartuussummik ingerlatitseqqinneruvoq, angut 53-inik ukiulik, danskiusoq, Nuummilu qalipaasoq namminersortoq, ukiuni sisamani pinerluuteqarsimasunik inissiisarfimmiittussangorlugu eqqartuunneqarmat, 1,8 millioni koruunillu taamani arsaarinnissutigineqarput.

Angut paasineqarpoq ikiaroornartoq hashi 10 kiilumit annertunerusoq karsimi qarmasissiaaqqanik imalimmi Nuummi qalipaasut ittuannut nassiussassamiittoq Aalborgimi politiit akitsuusiinermullu sulisut nassaarimmassuk. Hashi qarmasissiaaqqanik politiit taarserpaat, pallilu annguffissaata tungaanut malittaralugu.

Taama pisoqareermat Nuummi politiit misissueqqissaarput, uppernarsaatissanik ujaasillutik. Nassaaraallu ikiaroornartoq hash 6 kiilu, aningaasallu 308.000 koruunit.

-Hashimik 17 kiilup missaaniittumik arsaarinninnerput naammagisimaaqaarput, pingaartumik ikiaroornartup aqqusinermi tuniniarneqalinnginnerani, Finn Jeppesen oqarpoq.

Eqqartuussineq tallimanngorpat naammassissaaq.