Qaleruallit ilisimatusaatigineqalerput
Qalerualinnik sapigaqartarneq pillugu ullumikkut ilisimaqartoqarpianngilaq, naak Kalaallit Nunaanni tamakku nerisarineqarluartaraluaqisut, Dronning Ingridip Napparsimmaviani nakorsaq Henning Sloth Pedersen taama oqarpoq.
Henning Sloth Pedersen Århusip Ilisimatusarfiani inuiaat peqqissusaannik institutimi nakorsanngornianut Nunatsinnut attuumassutilinnut ilinniartitsisunngulerpoq, avatangiisit sulinermilu atukkat kingunerisaannik nappaatit ilinniartitsissutigissallugit.
- Qalerualinnik sapisaqartarneq pillugu ilisimatusarluta aallartinnissarput Kalaallit Nunaannut pingaaruteqaqaaq, Kalaallit Nunaannilu peqqissuseq pillugu suliassanik naammassinnissutaasinnaasunik ilisimatusaqataassaanga. Henning Sloth Pedersen oqarpoq.
Suliassaqarluassaqaaq, Nunatsinni pualasuujuneq ajornartorsiutinngoriartormat, nakorsat avatangiisit sulinermilu atukkat kingunerisaannik nappaatit pillugit suliaqartut piaartumik suliarisariaqagaannik, Henning Sloth Pedersen erseqqissaavoq.
Henning Sloth Pedersenilli nunarput qimavissanngilaa, Nuummi nakorsatut sulinini ingerlateqqissavaa Nuummiiginnassallunilu. Ukiumulli ataasiarluni Århusimut ilinniartitsiartortassaaq.
