Qalerallit tunisat akitsortut
oktobarip 28-at 2005 05:15
Qaleralinnut bonusip allanngortinnissaa isumaqatigiissutigineqarsinnaanngilaq, qaleralinnilli tunisinermi akit qaffannialerput.
KNAPK-p Royal Greenland A/S-illu isumaqatigiinniarnerat taama inerneqarpoq.
Bonusiliisarneq, KNAPK-mit siunnersuutigineqaraluartoq, illuatungeriit isumaqatigiissutigisinnaasimanngilaat.
Paarlattuanilli isumaqatigiissutigineqarpoq qaleralinnut, ningittakkersorluni pisanut pitsaanernut, tunisinermi akigitaasoq, kiilumut 80 ørimik qaffanneqassasoq.
Tunisinermi aki tassa imaalerpoq, qaleralinnut angisuunut 3,5 kiilumit oqimaannerusunut 9 krone 80 øre, aalisakkanullu taassuminnga oqinnerusunut 5 krone 90 øre.
Akit nutaat ukioq manna novemberip ulluisa aallaqqaataanni atuutilissapput.
