Qalerallit sumiittarneri paasiniarneqalerpoq
Ilisimatooq Aaron Fisk aasamut nunanut issittunukassaaq, tamaani qalerallit ikkussiffiginiarlugit chipsinik qaammataasanut attaveqarsinnaasunik 25-nik aammalu chipsinik elektroniskiusunik 70-nik. Aamma eqalussuit ikkussuiffiginiarpai.
Chip-i ataaseq 5000 koruunit sinnilimmik akeqarpoq. Chipit nassiussuinerannut tigooraassutit 70-t Nunavumi Cumberlandip kangerliumarnganut kivisinneqassapput.
Nassiussuutanik tigooraasutit aalisakkat qanoq ititigisumiinnerat, sumiinnerat aammalu immap qanoq nillertigineranik uuttuuissapput.
Chipsit mobiltelefoninut assersuunneqarsinnaasut ilisimatuup Aaron Fiskip oqaatigaa, tassami chipsit tigooraassummut nassiussuiinnaginnamik aammali tigooraassummit chipsimut nassiussuisoqarami.
Paasiniaaneq ukiuni arfineq marlunni ingerlanneqassasoq oqaatigineqarpoq, neriutigineqarlunilu siunissami nassissutinut tigooraassutinik amerlanernik kivisitsisoqarumaartoq.
