Qalerallit pujuukkat RG-imut uterteqquneqarput

Inuussutissaqarnermut aqutsisoqarfimmiit ilisimatitsipput, qaleralinni pujuukkani, Royal Greenlandimeersuni, 100 grammikkuutaarlugit poortukkani, navianartumik, listeriamik, bakteriaqartoq uppernarsineqarmat, taakku uterteqquneqartariaqarsimasut.

Qalerallit taakku Danmarkimi pisiniarfippassuarni nioqqutaapput, pisisartullu taamaattunik pisisimasut Inuussutissaqarnermut aqutsisoqarfimmit kajumissaarneqarput, pisiatik pisiniarfimmut pisiffigisaminnut uterteqqullugit, imaluunniit igiinnaqqullugit.

Qalerallit listeriamik bakteriartallit aasaq juunimi aamma uteqquneqartariaqarsimapput, tassa ajornartorsiut Royal Greenlandip aatsaat naammattuulinngilaa.

Uumasut nakorsaat, Mads Thor Madsen, Kalaallit Nunaanni akisussaasuusoq, isumaqarpoq kalaallit ernumasariaqanngitsut:

- Qaleralinnik pujuukkanik uterteqqusissummik Danmarkimi Inuussutissalerinermut aqutsisoqarfimmit pisimanngilanga, taamaammat naatsorsuutigaara qalerallit uterteqquneqartut taakku Kalaallit Nunaanni nioqqutigineqanngitsut, Danmarkimiinnarli.

- EU-mi Rapid Alert Systemimimik taaneqartartumut ilaavugut, nioqqutissanillu utertitsisoqassagaluarpat sukkanerpaamik kalerrinneqartussaavugut, Mads Thor Madsen oqarpoq.

Royal Greenlandimi attaveqaqatigiinnermut siunnersortip, Siverth Amondsenip, ilisimatitsissutigaa, qalerallit uteteqqusaasut Avannaaneersuusut, Hirtshalsimili Royal Greenlandip suliffeqarfissuani suliarineqarsimallutik, Danmarkimiinnarlu nioqqutaasut uppernarsarpaa.