Qalerallit pillugit tusagaq nuannersoq

Ilisimatuut Kalaallit Nunaannut Canadamullu inassuteqaataat kingulliit malillugit Davisstrædemi qaleralinniarneq siunissami 30 procerntingajammik annertusineqarsinnaavoq, tassa ukiumut 11.000 tonsimiit 14.000 tonsinut. Taamaalilluni siullerpaamik Atlantikup avannaani qaleralinniarneq biologit siunnersuuteqarneratigut annertusineqarsinnaanngorpoq. Siunnersuut Atlantikup Avannaata Kitaani Aalisarneq Pillugu Suleqatigiiffiup, NAFO-p, kingullermi ataatsimiinnerata kingornagut saqqummerpoq.

Pinngortitaleriffimmi imikkortoqarfimmi pisortaq, Helle Siegstad, oqarpoq, qaleraleqatigiit ukiorpassuarni assigiiginnakannersumik aalisarneqareersimallutik massakkut ajunngitsumik ingerlalersimasut.

Pinngortitaleriffiup pisortaata, Klaus Nygaardip ineriartorneq taanna nuannaarutiginerarpaa:

- Tamanna siunertalimmik ilisimatuutut misissuinerup malittarinninnerullu, aamma aalisagaqatigiinnik isumatuumik aqutsinerup aammalu Kalaallit Nunaata Canadallu Nunavut ilanngullugit qalerallit iluaqutigineqarnerannut tunngatillugu paaseqatigiilluarnerata kinguneratut isigaara.