Qalerallit nunani allani suliffissaqartitsipput

Ulluni makkunani avannaani suliffissanik noqqaaleruttorfimmi paasinarsivoq qalerallit avannaani pisarineqartartut amerlanersaat suliarerpiarnagit avammut nioqqutigineqartartut nunanilu allani suliffissaqartitsillutik.
Allattoq Noah Mølgaard
decembarip 15-at 2010 09:13

Qalerallit avannaani pisarineqartartut amerlanersaat niaquiinnariarlugit erlaviiginnarlugillu containerinut qerititsivinnut ikeriarlugit nunani allani pisisartunut nassiunneqartarput.

Siumut sinnerlugu inatsisartunut ilaasortaq Kristian Jeremiassen paragraf 36 naapertorlugu apeqquteqaateqarpoq paasiniarlugu qalerallit avannaani qanoq suliffissaqartitsitiginersut.

Naalakkersuisut akissutaanni ersippoq qalerallit amerlanersaat niaquiinnarneqartartut J-cut-imik taaneqartartumut suliarineqartartut. Nunani allani pisisartunut nutaanut aalisagaq anngukkaagami aatsaat suliareqqinneqartarpoq.

- Tunisassiornermut pingaaruteqartoq tassaavoq pisisartut annerusumik minnerusumilluunniit suliareriikkanik piserusuttarnerat akilu pitsaanerpaaq anguniarlugu avammut tunisassiortoq piumaneqarnerusunik tunisassiortariaqartarmat, taama aalisarnermut piniarnermullu naalakkersuisut Ane Hansen Kristian Jeremiassenimut akissummini allappoq.

Nunatsinni kisitsisini naatsorsueqqissaartarfimmit kisitsisinik 2009-meersunik pissarsisimavoq qalerallit qanoq suliffissaqartitsinerannut takussutissiisunik. Qalerallit ilivitsuutillugit 15.217 tonsit avammut nioqqutigineqarsimapput taamaallaallu 5.607 tonsit siariaannanngorlugit suliarineqarsimallutik.

Tunisassiorfiit pisisartut piumasaannut aamma naleqqussarniarsimapput.

Avannaani suliffeqarfiit 23-it qaleralinnik tunisassiortuupput. Taakkunannga 21-it qalerallit niaquiinnariarlugit erlaviiginnariarlutillu avammut nioqqutigisarpaat taamaallaat marluk siariaannanngorlugit tunisassiortarlutik.

Pissutsillu taamaapput naak siariaannanngorlugit tunisassiat akiginnerugaluartut. Qaleralik ilivitsuutillugu avammut tunineqartoq 17 krone 71 øre-mik akeqarpoq siariaannanngorluguli suliaq kilomut 22 krone 85 øre-mik pissarsissutaasarluni..

Sulisartulli aamma suliartornissaminnik nakkutiginnissinnaanerat apeqqutaaqataanerarneqarpoq.

- Piffissap ilaatigut sumiiffiit ilaanni qalerallerisussannik naammattunik sulisussaqarniarneq ajornakusoortarpoq tamatumalu kingunerisarpaa qalerallit pisariaqarnerusutigut tunisassiatut taamaallaat suliarineqartariaqartarneri, taama Ane Hansen oqarpoq.