Qalerallit akii qaffangaatsiarput

Qalerallit tunineqartarnerinut akit qaffanneqarput. KNAPK Arctic Green Foodilu qalerallit akii nutaat pillugit isumaqatigiissuteqarput.
Allattoq Jaaku Lyberth
juunip 26-at 2010 13:30

Qalerallit 800 gramminit kilonik pingasunik oqimaassusillit tikillugit akii 53 procentinik qaffapput, 9 koruuninik 50 ørinillu akeqalerlutik.

Qalerallit 3 kilonit qummut oqimaassusillit kilomut 14 koruninik akeqalerput, qaffaaneq 36 procentinik annertussuseqarluni.

Tunisanut akit qavaatigut qalerallit assartorneqarnerinut tapeq kilomut 1 kr-inngorpoq.

Saarulliit akii pillugit KNAPK aamma Arctic Green Food ulluni makkunani isumaqatiginniarput, tamarmik neriuutigaat ajunngitsumik isumaqatigiissuteqartoqassasoq.

Aalisakkat neqillu tunisassiassat, tulaassorneqartarnerinut periusissat, tunisassiat ineriartortinneqarnerat, pitsaassutsillu pillugit KNAPK aamma Arctic Green Food ukiamut Maniitsumi naapinniarlutik isumaqatigiipput.