Qalerallit 441 tonsit pissutaallutik Karl Lyberth tunuarpoq
Tonsinik taama annertutigisunik ikinaarussisimaneq, Inatsisartuni ilaasortap, Karl Kristian Kruse-p allakkatigut, decembarip 29-anni nassiussamigut uparuarpai, piumasaralugu piaarnerpaamik taakku aaqqinneqarnissaat.
Karl Kristian Kruse-p allakkamini ilaatigut oqaatigaa, ikinaarussisimaneq allaat tillinnertut oqaatigisariaqartoq.
- Ikinaarinneq pillugu piaartumik Naalakkersuisunut allagaqarpunga. Allakkannilu ersarissumik aamma oqaatigaara, maannakkorpiaq aaqqiisoqanngippat tamanna aalisartunit tillinnertut oqaatigineqarsinaassammat.
Siumup Inatsisartuni politikkikkut oqaaseqartartua, ippassaq nutaatut ivertinneqartoq, Karl Kristian Kruse taama oqarpoq.
Aalisarnermut Naalakkersuisutut tunuartoq, Karl Lyberth, Naalakkersusisut siulittaasuat peqatigalugu tusagassiortunut ippassaq katersortitsinermi ilaatigut ima nassuerpoq.
- Piffissami kingullermi ajuusaarnartunik marlunnik kukkussuteqarpunga. Tassa qaleralinniarnermut tunngatillugu, kisitsisit aallaaviusussat kukkusut taakkununnga pisassiissutigisimavagut, tamannalu uanga nammineq tamakkiisumik akisussaaffigaara, Karl Lyberth ippassaq taama oqarpoq.
Siumup Inatsisartuni ilaasortaatitaata, Karl Kristian Krusep pisassiissutinik eqqunngitsunik tunniussisoqarsimanera allagaqaatigereeraalu, Naalakkersuisut nutaamik pisassiissutinik agguaapput, tamannalu pivoq decembarip 29-anni.
Upernavimmiunut, Uummannarmiunut Qeqertarsuullu Tunuarmiunut qalerallit angallatinut 6. meterinik anginersunut 2014-imut pisassiissutigineqaraluartut katillugit 10.242 tonsiupput. Taakkulu tassa Naalakkersuisunit decembarip 29-anni allanngortinneqarput, sumiiffinnut qulaani taasatsinnut katillugit 10.683 tonsinngorlugit, tassa nikiganeri tassaalluni 441 tonsit.
- Ukioq 2013 naalersoq nalunaarutigineqarpoq pisassiissutit eqqortumik aaqqinneqartut. Kisianni avaqqunneqarsinnaanngilaq, pisassiissutit eqqortumik avammut nalunaarutigineqanngippata taava Naalakkersuisup mannineerluni tamanna akisussaaffigissammagu, Karl Kristian Kruse taama oqarpoq.
Qalerallit angallatinut 6. meterinik anginersunut pisassiissuteqarnermi Naalakkersuisunit anguniarneqarpoq, pisassiissutit ukioq naallugu atuussinnaaneri, taamaaliornikkut anguniarneqarluni aalisartunut tunisassiortunullu tamassuma iluaqutaanissaa aamma Qaasuitsup Kommuniani suliffissaqartitsiniarnermut pisassiinerup iluaqutaanissaa siunertarineqarluni.
