Qaleralittassinneqarusunneq

Aasiaat borgmesteriata Enok Sandgreenip naalakkersuisunut ippassaq nukingisaarutigaa qaleralittassinneqarnissartik qaqugu naalakkersuisunit aalajangiivigineqassanersoq.

Aalisarnermut Piniarnermullu naalakkersuisoq Finn Karlsen aperaarput, Aasiammiut qangali qaleralittassinneqarnissaminnik qinnuteqartut piaartumik qaleralittassinneqassanersut.

- Taanna akiuminaatsittorujussuuara, Aasiaat borgmesteriata sakkortuumik qisuariarnera paasilluarsinnaavara, Finn Karlsen oqarpoq.

Nangipporlu:

- Tassami qaleralittassat upernarsarli eqqartorneqalerput taavalu aamma apriilip arfernani inassuteqaatit siullerpaamik naalakkersuisunut saqqummiunneqarput. Taavalu tamatuma kingorna aamma suliaq kinguartinneqarpoq, maajip naalernerani naalakkersuisunut saqqummiunneqaqqipput, taavalu taamanikkut naalakkersuisunut saqqummiunneqarnerani piumasarineqarpoq tunineqartoq taanna ulluni 14-inik periarfissinneqassasoq, tassalu piumasaqaatit naammassineqarsinnaanngippata isummerfigineqaqqissammat tassa sapaatip-akunnerata uuma naalernerata missarpiaani aalajangiivigineqavissapput, Finn Karlsen oqarpoq.

Taanna aperaarput, Aasiaat kommunia assut aningaasatigut ajornartorsiormat tamanna nukinginnartutut isiginnginneraa.

- Ilumut nukinginnartorujussuartut isumaqarfigaara. Aamma massakkut piareersarnissaq eqqarsaatigalugu pingaaruteqartupilussuuvoq qangali aalajangereersimanissaat. Kisianni tassa pissutsit assigiinngitsut peqqutigalugit kinguartinneqaqattaarput taakkua aalajangiivigineqarnissaat, oqarpoq.

Finn Karlsenip aamma Aasiaat borgmesteria naqqiissuteqarfigalugu oqarpoq. Taanna ippassaq radio aviisimi oqarsimammat pisassinneqarnissamik qinnuteqaramilli allat aamma pilernguttorpassuit saqqummerarsimasut.

- Taanna eqqunngilaq Aasiaat qinnuteqanngikkallarmalli pilernguttorpassuit allat pereerput, oqarpoq.

Nassuiaavoq piumasut amerlaqimmata naalakkersuisut isummertut piumasat immikkut ittumik pisassiissutigineqartut tamakkiisumik nunamut tulaallugit suliarineqartalissasut.

Aasiaat 3.300 missaanni inoqartoq inunnik 300-nik suliffissaaleqiffiuvoq.