Qaleralittassiissutit amerlineqassappat?

Nunatsinni assortuussutaasartut ilagaat qaleralittassiissutit. Aalisartunit ikigineqarput, biologit tamanna isumaqatiginngilaat politikerillu naapititsiniaallutik aalajangersaasarput.
apriilip 30-at 2013 11:36

Qaleralittassiissutit aalisartunit ukioq tamakkerlugu naammattusaariniarnerat annertuumik ajornartorsiutigineqarpoq. Ukiup aallartinnerani aalisagarpassuit tulaassorneqarput, tamannalu pissutigalugu sumiiffippassuarni ukiup sinnerani qaleralinniarneq unitsinneqarluni. Aalisarnerup iluani suliaqartunut taamatut inissisimaneq pitsaasuunngitsoq.

Qaleralittassiissutit aamma qineqqusaarnermi saammineqarput. Qinersisartunillu ataatsimiisitsinerni tv-kkullu apeqqarissaartoqarnerani annertuumik oqallisigineqartarput. Qaleralittassiissutit siunissami qaffanneqarnissaannik Siumut ilaatigut oqariartuuteqarpoq, Inatsisartunngortulli qaleralittassiissutit kimilluunniit suli eqqaaneqarsimanngillat.

Tamannalu Hans Enoksenip maanna iliuuseqarfigaa. Parteeqatiminut aalisarnermut naalakkersuisumut Karl Lyberthimut § 37 naapertorlugu apeqquteqaammi apeqqutigaa, angallatinut, Enoksen naapertorlugu annikippallaamik pisassinneqarsimasunut, qaleralittassiissutit qaffanneqarnissaannik pilersaaruteqartoqarnersoq.

Ileqqorineqartoq malillugu, Lyberth Hans Enoksenimut akissuteqarnissaminut ullunik qulinik periarfissaqarpoq, akissutissaalu nunatsinni umiatsiaararsortunit qilanaarineqarluni utaqqineqarnissaa qularnanngilaq.