Qaleralittassiisoqarpoq

Allattoq Jokum Nielsen
juunip 20-at 2006 05:24

Qaleralittassat naalakkersuisut ippassaq kiisami aalajangiiffigaat.

Qalerallit 2500 tonsit missaaniittut agguaanneqarnissaat aalisartut ukiup affaani utaqqisimavaat, naalakkersuisulli ippassaq tassa agguaassipput.

Aasianni Sigguk A/S-imut qalerallit 1825 tonsit pisassiissutigineqarput.

Nukik Seafoodimut qalerallit 600 tonsit, taakku Qaqortumut tulaanneqartassallutik.

Sigguk a/s suliffeqarfik nutaajuvoq, taamaammat qalerallit taakku tamakkiisumik suliarisinnaanerai suli ilisimaneqanngilaq. Qalerallilli 1825 tonsit ilumut suliarisinnaanerlugit kingusinnerpaamik sisamanngorpat akissuteqareersimassapput.

Qaleralittassanik agguaassinissaq sivisuumik utaqqineqarpoq, tamannalumi naammagittaalliutigineqaqaluni.

Piniarnermut Aalisarnermullu Inatsisartuni ataatsimiititaliami siulittaasoq, Ane Hansen, IA, naammagittaalliortunut aamma ilaavoq, Naalakkersuisut aalajangerniarnerat arriippallaamik ingerlaneralugu oqarluni.

Illoqarfiillu qaleralittassinneqartussat tupinnanngitsumik aamma naammagittarunnaavikkaluarput. Qaleralittassinneqarnissaq Aasianni borgmesterip, Enok Sandgreen-ip, qaammatini arlalinni utaqqisimavaa. Taanna oqarsimavoq, qaleralittassinneqanngikkunik Aasianni aningaasaqarniarneq suli ajornartorsiulernerussasoq.