Qaleralittassat sinneri aalisarneqarsinnaalissapput

-Tassa sapaatip akunnerata missaa aalisarneqarsinnaassapput. Aalisarfik massakkut ataasiinnaavoq, tassa Torsukattak, Ilulissat Kangerluata aalisarfigineqarsinnaanera nalorninarmat, Ilulissani aalisartut piniartullu peqatigiiffianni siulittaasoq, Peter Olsen, oqarpoq.

Ilulissani qaleralinnik tunisassiorfimmit namminersortumit, tassa Halibut Greenlandimit erseqqissumik oqaatigineqarsinnaanngilaq tunisassiorneq qaqagu aallarteqqinneqassanersoq. Naatsorsuutigineqarporli 10 tonsit siulliit tulaanneqarsimalermata qalerallerisut 33-t suliartortinneqarsinnaasut.

Ilulissani aalisartut piniartullu peqatigiiffiannit, Qeqertarsuup Tunuani qaleralittassat ukioq mannamut sinneruttut 200 tonsit, decemberimut pisassatut sillimasiunneqarnissaannik siunnersuuteqareersullu, qaleralinniarneq oktobarip 25-ani unitsikkallarneqarpoq.

- Qalerallit aalisakkatut allatulli killilersugaapput. Taamaammat tusagassiuutinut nalunaarutigineqarnikuuvoq oktobarip 25-ani matuneqartut, ammaqqinneqassasullu decembarip aallaqqaataani unnuap qeqqanut aallartissasoq, Peter Olsen oqarpoq.

Aalisarnermit Nakkutilliisunit kisitsisit najoqqutaralugit qalerallit 144 tonsit Qeqertarsuup Tunuani siorna decembarimi tulaanneqarput.