Qaleralittassat allannguuteqannginnissaat biologit innersuussutigaat

Qalerallit minneruleraluttuinnarneranik tunngaveqartoq Pinngortitaleriffimmit oqaatigineqarpoq.

- Pujuaannartitsinissaq qulakkeeneqassappat ingerlatsinermut pilersaarusiortoqartariaqarpoq, Pinngortitaleriffimmi immikkoortortami pisortaq Helle Siegstad oqarpoq.

Misissuinerit takutippaat Uummannap sulluani ukiuni kingullerni qulini qaleralinniarnermi agguaqatigiisillugu ukiumut 5000 tonsinik pisaqartoqartartoq. Ukiunilu kingullerni pingasuni qalerallit minneruleraluttuinnartut.

- Tamanna navianartorsiornermut takussutissaavoq. Taamaammat biologit innersuussutigaat qalerallit 5000 tonsit pisassiissutigineqassasut. Uummannami misissuinermi biologit misissuineri kiisalu aalisarnermi misissuinerit tunngavigineqarput. Aalisarnermi misissuisoqaraagat aalisakkat angissusii uuttorneqartarput.

Helle Siegstadip Qaasuitsup kommunianut ataatsimut pisassiisalernissaq akuersaarsinnaanngilaa, tamanna KNAPK-imit siunnersuutigineqaraluarpoq.

- Tamanna biologitut isumatusaarnerunngitsutut nalilerpara. Kangerluit sumiiffiillu assigiinngitsut Ilulissanut , Uummannamut Upernavimmullu agguataaneqartut immikkut qaleraleqarfiupput. Tassa qalerallit Davis Strædemit immap sarfarneranit kangerlunnut pulasarput, tassanilu alliartorlutik kangerlunniiginnartarput, taakkulu qaleraleqarfiit assigiinngitsut ataatsimut pisassiiffigineqarsinnaanngillat, Helle Siegstad oqarpoq.

Ingerlatsinermut pilersaarusiorneq piujuaannartitsilluni aalisartoqalissappat ingerlatsinermut pilersaarusiornissaq Helle Siegstadip siunnersuutigaa. Tassani biologit, aalisartut, ingerlatsisut aqutsisullu aalisarneq pillugu assigiinngitsunik oqaluuserinnissinnaapput.

- Aalisakkat qanoq angissusillit kissaatigaagut? Aalisarnermi aalisartut qanoq amerlatigissappat? Pisuussutit pitsaanerpaamik qanoq atorneqassappat? Biologit innersuussinerminni nalorninartorsiornerat qanoq atorluarneqarsinnaav? Helle Siegstad ingerlatsinermut pilersaarusiornermi oqaluuserineqarsinnaasut pillugit oqarpoq nassuiaallunilu ingerlatsinermut pilersaarut ukiuni pingasuni imaluunniit sisamani najoqqutarineqartussatut misilinneqarsinnaasoq kingornalu nalilersorneqarluni.

Namminersorlutik Oqartussat ingerlatsinermut pilersaarusiuleruttorput.