Qaleralinnut akuersissutit aalisartuniit utaqqikatanneqarput

juulip 18-at 2005 15:15

Uummannap kommuniani qaleralinniat ulloq manna tikillugu qaleralinnut akuersissutinik julip aallaqqaataani tunniunneqareersimasussaagaluartunik Namminersornerullutik Oqartussanit agguaassiffigineqarsimanngillat.

Uummannami Inuussutissarsiornermut Ataatsimiititaliami siulittaasoq, Apollo Mathiassen, Uummannamilu aalisarnermut piniarnermullu peqatigiiffik, Aalisarnermut Piniarnermullu Pisortaqarfimmut naammagittaalliuuteqarput, qaleralinnut akuersissutit 2005-miit 2006-moortut suli atuisussanut anngunneqarsimanngimmata.

-Akuersissutit nutaat pissarsiarineqanngippata kikkut aalisarnermut akuersissuteqarlutik ukiormanna ukiullu tullianut aalisarsinnaanersut takussutissaqartinngilarput, maangaannarlu unittoqannginissaa anguniarlugu PIsortaqarfimmut naammagittaalliuteqarpugut, Apollo Mathiassen oqarpoq.

Qaleralinniallu eqqorneqartussat 200-t missaanniittut Apollo Mathiassen-ip oqaatigaa.

-Isumaqaraluarpunga taanna suliassaq qassiiliutaanani juli aallartitsinnagu naammassineqareersimasussaagaluartoq, taannalu uagut akuerisinnaanngilarput.

Apollo Mathiasseni oqarpoq, Namminersornerullutik oqartussanit suliaq naammassineqarsinnaanngippat nalileeqqittoqartariaqartoq, ajornanngippallu siunissami kommuneqarfinnut tunniunneqarsinnaagaluartut.

Qaleralinniarneq maannamut ingerlanneqartoq, Apollo Mathiassenip ilanngullugu erseqqissaatigaa.