Qaleralinnik uuttortaallammak nassaaraat
Isumaqatigiissutaavoq piniarnermik nakkutilliisut tunioraavinni sikumilumi aalisakkanik amuneqartunik uuttortaasassasut. Uuttortaanikkummi paasissutissat pissarsiarineqartartut Pinngortitaleriffiup siunnersuisarneranut pingaarutilerujussuupput, Kitte Vinter-Jensen Pinngortitaleriffimmi paasissutissiisartoq oqaluttuarpoq.
Ukiumi qaangiuttumi uuttortaanerit nalunaarsorneqarneranni paasinarsivoq piniarnermik nakkutilliisoq ataaseq ilaminit angusarissaarnerusoq, tassa Anthon Zeeb Uummannaminngaanneersoq qaleralinnik 9167-inik uuttortaasimagami.
Taakkuami Pinngortitaleriffiup nammineq biologassistentiisa ukioq kingulleq uuttortarsimasaannit 3000-ingajalluinnarnik amerlanerupput.
Aalisagaqatigiit qanoq annertutigisumik aalisarneqarsinnaanerisa naatsorsorneranni aalisakkat pisaasut qanoq angitiginerisa ilisimanissaat uagutsinnut pingaarutilerujussuuvoq, Pinngortitaleriffimmi biologi Anja Retzel oqaluttuarpoq, nangillunilu:
Aalisakkat mikisut 5 tonsit amuneqarpata tamanna aalisakkat angisuut 5 tonsit pisarineqarneranniit aalisakkat amerlanerujussuit pisarineqartarnerannut takussutissaasarpoq.
Taamaattumik siunnersuinitsinnut uuttortaanissamik pisussaaffiliisarnikkut angissutsinik uuttortaasarnerit pingaarutilerujussuusarput. Tamannami aalisarnerup ikiliartuutaannginneranik naliliinissatsinnut sakkussanit pitsaanerpaavoq, Anja Retzel oqaluttuarpoq.
Piniarnermik nakkutilliisunik aalisarnermillu alaatsinaattunik suleqateqarneq Pinngortitaleriffimmut pingaarutilerujussuuvoq, tamatumami qularnaartarpaa aasaaneraniit ukiuuneraniillu paasissutissanik sumiiffinit assigiinngitsorpassuarneersunik pissarsisitsinermigut siunnersuinermut tunngavissaliisaramik.
