Qaleralinnik pisasseeqqittoqanngilaq
Borgmester Jess Svanep Uummannap Sulluanut qaleralinnik pisasseeqqittoqaqqinnissaanik neriuutaa piviusunngunngitsoorpoq. Jess Svane aamma Naalakkersuisunut ilaasortaq Ane Hansen ippassaq ataatsimeeqatigiipput. Ataatsimiinnermi annerusunik pisassiisoqaqqissasoq, borgmester Jess Svane neriuuteqaraluarpoq, tamannali piviusunngunngilaq.
oktobarip 01-at 2010 12:56
Qanoruumut unnugu aallakaatinneqartussamut borgmester Jess Svane ima oqarpoq:
- Imatut paasivara Ane Hansenip pinngortitaleriffimmiut annerusummik paasisaqarfigerusukkai, borgmester Jess Svane oqarpoq. Tamannalu Uummannamut qaleralinnik pisassiisoqannginneranik paasineqassaaq.
Aalisarnermut, Piniarnermut Nunalerinermullu Naalakkersuisoq, Ane Hansen, Uummannami qaleralittassat nungunneqarmatali suli oqariartuuteqanngilaq. Aalisartut 314-it qaleralinniarnissaminnut akuersissutillit sisamanngornermi septembarip 23-anni qaleralinniaqqusaajunnaarput, qaleralittassat katillugit 5.549 tonsit pisarineqareermata.
Qaleralinnik 5000 tonsinik Uummannamut 2011-mi pisassiisoqassasoq biologit innersuussutigereerpaat.
