Qaleralinniat suli sattapput
- Sinerissap qanittuani qaleralinniarneq pillugu nalunaarut atuutsinneqalereerpoq, taamaattoq uagutsinnut erloqinartorujussuuvoq ilisimatinneqarani ukioq manna qaleralittassagut qanoq amerlatigissagaluarnersut, Peter Olsen, Ilulissani KNAPK´p immikkoortortaani siulittaasoq oqarpoq.
Naalakkersuisut aalisarneq pillugu peqqussutissanik nutaanik marlunnik atuutilertitsissallutik sapaatip akunnerani kingullermi akuersipput. Aappaa tassaalluni sinerissap qanittuani qaleralinniarneq pillugu nalunaarut, ataasinngornermi februaarip 6-ani atuutsinneqalersoq.
Peqqussut naapertorlugu sinerissap qanittuani qaleralinniarsinnaanermut akuersissummik pigisaqartut pisassiissutinit pigisassaannik aalajangersaasoqassaaq, aalisariummik 6 meterinik anginerusumik ukiuni kingullerni pingasuni qaleralinniarsimanermi pisat agguaqatigiinnerisigut.
- Aalisartunut toqqissisimanassaaq ukioq manna qanoq amerlatigisunik qaleralissinnaanissaminnut ilisimatitsisoqarpat. Maannakkummi allatorluinnaq qaleralinniartarnissarput naatsorsuutigisariaqalissavarput, qaleralittassiissutigineqartut nungunnissaasa tungaannut aalisartarneq atorunnaassamat, Peter Olsen oqarpoq.
Peqqussumi nutaami allassimasoqarpoq qaleralinniarsinnaanermut akuersissutaatillit 6 meterinillu anginerusunik aalisariutillit, Upernaviup Uummannallu eqqaanni Qeqertarsuullu Tunuani aalisartut marsip aallaqqaataani piaartumiluunniit nutaamik akuersissutinik tunineqassasut, akuersissummi qaleralinniarsinnaanermut pisassiissutinit pigisat nalunaarsimassallutik.
Peqqussut nutaaq aalisartut ataasiakkaat pisassiissutinit pigisanit tuniniaanissaannut tunngaveqarpoq. Pisassiissutinit pigisat aningaaserivinni taarsigassarsiniarnerni ilaatigut qularnaveeqqutitut atorneqarsinnaassapput.
