Qaleralinniat peqatigiiffiliulerput

KNAPK ilaasortaminut illersuisannginnera, kattuffiullu aaqqissuussaanerata ullutsinnut naleqqukkunnaarsimanera, suleriaasaatalu eqarpallaarnera ilaatigut tunngavilersuutigalugit Ilulissani, Saqqami Qeqertami Ilimanamilu aalisartut piniartullu peqatigiiffiini ilaasortat ilaat tunuarniuteqarput, namminnerlu Qaleralinniat Kattuffiannik pilersitsissallutik maanna sulissuteqalerlutik.
Allattoq Oline I. Olsen
aggustip 18-at 2012 13:04

- Qaleralinniat ulluinnarni inuuniarnerannut tunngassuteqartut ukiuni kingullerni pitsanngoriartorsimanngillat, killormulli ajorsiartuinnarput, Qaleralinniat kattuffiannik pilersitsiniat ilaatigut taama nalunaaruteqarnerminni tunngavilersuipput.

Taakku KNAPK-imit tusaanngitsuusaarneqartutut misigisimanertik ilungersunaraat, qaleralinniarnerlu pillugu KNAPKp sanngiinnerujussua tunngavigalugu qaleralinniat kattuffiliornissaat pinngittoorsinnaajunnaartoq unnerlugu.

- Qaleralinniarnerup aaqqissuussaaqqinnera ataatsimut isigalugu atuisutut isumaqatiginngilarput, Anthon Lindenhann Qaleralinniat kattuffiliorneranni akisussaasutut inissisimasoq oqarpoq.

Taanna aamma nassuiaavoq KNAPK aqqutigalugu qaleralinniarnerup aaqqissuuteqqinnerani ataatsimiititalianut atuisutut inissaqartitaanissartik piumasarisarsimagaluarlugu iluatsittanngitsumilli.

Qaleralinniat kattuffiannik pilersitsiniat avannaani qaleralinniaqarfinnut maanna paasiniaapput kattuffiliornissamullu ilaasortassarsiorlutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq