Qaleralinniat KNAPK-mut ilaasortaajunnaartut

Uummannap sulluani aalisariutaatillit qaleralinniat arfineq-pingasut kattuffimmit ullumimiit anipput.
Allattoq Najaaraq Egede
oktobarip 13-at 2009 17:33

Kalaallit Nunaanni Aalisartut Piniartullu Kattuffiat KNAPK naalakkersuisunut nikussaarusunngimmat taama aalajangertariaqalersimallutik, qaleralinniaq Karl Markussen, Uummannamiit oqarpoq.

- Kattuffik ulloq manna tikillugu tusagassiuutitigut tutsiussimanngilaq, aallaqqaammulli allakkani taamaallaat innersuussutigalugu. Isumaqarpunga taama kattuffeqassagaanni - kattuffik ingerlassaguni . ullutsinni isumalluutaasinnaanera killilerujussuusoq, Karl Markussen oqarpoq.

Uummannap sulluani qaleralinniat peqatigiit KNAPK-mit aninerminnik nalunaarutaat Kalaallit Nunaanni Aalisartut Piniartullu Kattuffiata KNAPK-p siulittaasuata Leif Fontainep paasissutissatut tiguinnaritsik erseqqissaatigaa.

- Qaleralinniat atugaat paasisinnaalluarpagut, taamaammallu septembarip ulluisa 29-ianni qaleralittasseeqqinnissaq pillugu Aalisarnermut Naalakkersuisumut Ane Hansenimut saaffiginnissuteqarsimalluta. Tusarpara saaffiginnissuterput Naalakkersuisut ullumi oqaluuserissagaat, Leif Fontaine nassuiaavoq.

Sinerissami peqatigiiffiit 70-it missaanniittut KNAPK-mi ilaasortaapput. Uummannallu sulluani qaleralinniat ilaasortarpassuit ilagiinnarpaat.

- Siulittaasup oqaatigisimavaa paasissutissatut tiguinnarlugu. Tassuuna takuneqarsinnaavoq pingaartumik avaannaani qaleralinniaqarfiup tungaanut qanoq kattuffik misigissuseqartoq, qanorlu sulerusussuseq amigartigisoq, Karl Markussen nangippoq.

KNAPK-mit oqaatigineqarpoq naalakkersuisup akissutissaa utaqqineqartoq. Taanna utaqqimaarsinnaannginnassiuk?

- Isumaqarpunga ullumikkut taama pissusilersorneq unittariaqalersoq. Tassa, kattuffik imatut nikussaartariaqarpoq - ilaasortani ajornartorsiorpata imaanngilaq allaffimmut ingilluni akuli akissutissamik utaqqerujoortoqassasoq. Uagut taanna anersaarinngilarput maani. Sulissuugut uagut, allat sulerusunngippata.

Karl Markussenip erseqqissaatigaa Uummannami aalisartut peqatigiiffiat uani uparuartorneqanngimmat. Qaleralinniat nutaamik peqatigiiffittaartut 47 fodsiningaanniit qummut angissusilinnik aalisariutaateqartut amerlanerit Uummannameersuupput. Peqatigiiffiliornermut atatillugu aningaaserivimmut saaffiginnittoqareerpoq, pilersaarutaavorlu qaammatini tullerni pingasuni ilaasortassarsiornissaq.