Qaleralinniat isertitakipput

Namminersorlutik Oqartussat kisitsisaataanni tamanna takuneqarsinnaavoq.

Aalisarnermut Piniarnermut Nunalerinermullu Naalakkersuisoq qaleralinniat tulaassaat isertitaallu pillugit misissuisitsisuuvoq. Qaleralinnullu aqutseqqissaarnissamut pilersaarusiornermi kisitsisit atorneqarput. Qaleralinnik aqutsinermut pilersaarut ukioq manna naatinnagu naammassineqassasoq naatsorsuutigineqarpoq.

Kisitsisini aamma takuneqarsinnaavoq qaleralinniat 1255-it 10 procentiinnaai 200.000 koruunit sinnerlugit isertitaqartut.

Isertitat assigiinnginneri ilutigalugit aamma tulaassat taamatut agguataarneqarput.

Tulaassat isertitallu assigiinnginnerujussui naleqqussaasoqarnissaanut tunngaviusut, Aalisarnermut Naalakkersuisoq Ane Hansen oqarpoq. 2011-milu qaleralinniarnermi akilersinnaassutsip killiga nassaarineqassasoq oqaatigalugu.

- Aalisarneq imminut akilersinnaasoq aaqqissuusseqqinnermi anguniarneqartariaqarpoq. Imminut nammassinnaanerup killigititaa sumiinnersoq 2011-p ingerlanerani nassaariniarneqassooq, Naalakkersuisunut ilaasortaq Ane Hansen oqarpoq.

Qaleralinnut aqutsiveqarfiit pingasut Upernavik, Uummannaq aamma Ilulissat 2009 katillugit 19.800 tonsinik qaleralittassiivigineqarput.