Qaleralinniarneq suleqatigiissitanit misissuiffigineqarpoq

Angallatit pineqartut ukiumut tamarmut immikkut tamarmik pisassiissutinik pigisaqarsimapput. Matumani pisassiissutigineqartut ukiuni kingullerni pingasuni tunisat tunngavigalugit annertussusilerneqarsimapput, tamatumalu allanngortinneqarnissaa pilersaarutigineqanngilaq. Ataatsimiititaliap aalisartut aallartitaasa Naalakkersuisoqarfiullu peqataaffigisaat pisassiissutigineqartunik naleqqussaanissamut siunnersuutit misissorsimavaat, Naalakkersuisullu ataatsimiititaliap aalajangiussai ataqqivaat.

-Aalisartut angallatinit allanit pisassiissutinik sinneqartunik pisinissaminnut periarfissaqarput, aalisartullu taamaalioqqullugit kaammattorusuppakka. Maanngaanniit angallatinut meterinik 6-init takinerusunut annerusunik pisassiisoqarnianngilaq, Ane Hansen Hans Enoksenimut akissuteqaammini naqissusiivoq.

Sinerissap qanittuani aalisarnermi maanna ajornartorsiutigineqartut naalakkersuisut arajutsisimanngilaat, qaammatillu marlussuit ingerlanerini susassaqarfimmi nutaarsiassaqarumaarpoq. Aallaqqaasiullugulu pineqartumi inuussutissarsiuteqartut siunissaannik misissuisussamik suleqatigiissitaliortoqarsimavoq.

- Suleqatigiissitaq qaleralinniarnermut attuumassuteqartunit tamarluinnarnit peqataaffigineqarpoq, ilaatigut tassaallutik KNAPK, Qaasuitsup Kommunia, GA aamma SIK. Suleqatigiissitap kinguneqartussamik kaammattuuteqarnissaa taakkulu aappagumiit najukkani aalisartunut ilaqutigineqalernissaat naatsorsuutigaara, Ane Hansen allappoq.