Qaleralinniarneq pillugu sukaterisoqarnissaa aalisartut piumasaraat
Taakku ulluni kingullerni qulini avannaani angalaqatigeeqqammerput, maannalu qaleralinniarneq pillugu sukaterinissamut aalisartunit piumaffigineqarput.
- Aalisarneq maanna imminut illersorneqarsinnaanngitsutut taaneqarsinnaavoq, qaleralinniaq Paulus Karlsen Upernaviup eqqaani Innaarsunniit oqarpoq.
- Tassa imaakkami aalisartorpassuit eqqatsinni aalisalernikuugamik, qassusersorlunilu qaleralinniarneq ukioq kaajallallugu atuulluni, Paulus Karlsen Innaarsunnit oqarpoq. Aalisarnermut piniarnermut nunalerinermullu Naalakkersuisoq Ane Hansen KNAPK-ip siulittaasua Leif Fontaine peqatigalugu avannamut nunaqarfiit illoqarfiillu katillugit arfineq pingasut, avannaani Tasiusamiit kiisalu kujammut Ilulissat tikillugu angalaffigaat. Tassani qaleralinniarneq annerusumik sammineqarluni aalisartut piniartullu sinniisai naapittarpaat, oqariartuutigineqartullu ersaripput. Qaleraleqassutsimik piujuaannartitsineq anguneqassappat sukaterisoqartariaqarpoq, soorlu Upernaviup eqqaani qaleralinniarneq qassusersornikkut ingerlanneqartoq aasaanerani qaammatini pingasuni matoqqasarnissaa kissaatigineqarpoq. Qassutillu annaaneqartut piiarneqartarnissaat piumasarineqarpoq. Ilulissani umiatsiaararsorluni aalisartoq Johannes Mathiassen qaleralittareerpoq qassutikunik kalitalinnik.
- Massakkut aalisartut takujuartarparput, nutaarsiassarinagulu, qalerallit anginerit qassutikunik kalittut, qassutiniik anillannikut, kingaannikut. Tassa takussutissaapput qalerallit milliartuinnarnerannik, pissutigalugu qassutit tammarneqaraangamik (qaleralinnik) piniartuartuartarput. Imminiiginnaasarneq ileqquliunneqarsimasoq, taanna imminuinnaq eqqarsaatigineq, taanna unittariaqarpoq. Qassutillu matusariaqarput, Johannes Mathiassen oqarpoq. Qassutit annaasat piiarneqartarnissaat siornatigut kommunit isumagisarsimanngikkaat, Naalakkersuisunut ilaasortaq Ane Hansen oqarpoq. Tamannalu piujuaannartitsinissamut atatillugu naleqqutinngitsoq Ilulissani aalisartoq Johannes Mathiassen oqarpoq.
- Immap naqqata saligaatsuunissaanut atuisutuut assorujussuaq suleqataarusuppunga, pissutigalugu una qaleralik immap natersiortuungami, immap naqqa saligaatsuutinneqartariaqarpoq, Johannes Mathiassen oqarpoq.
Naalakkersuisunut ilaasortaq Ane Hansen kiisalu Leif Fontaine avannaanut angalaqatigiinnermi kingorna tusagassiuutinut ataatsimut nalunaaruteqarput, qaleralinniarnerullu piujuaannartinnissaa pillugu politikkikkut maanna iliuuseqarfigisinnaasaminnik qulinik saqqummiussillutik. Qaleralinniarneq pillugu sukaterisoqarpat piujuaannartitsinissaq anguneqassasoq, Paulus Karlsen isumaqarpoq.
- Oqareernittut aalisarneq imminut maanna nammassinnaangilaq, aatsaat sukaterisoqarpat aalisarneq immaqa imminut nammassinnaalissaaq, Paulus Karlsen oqarpoq.
