Qaleralik ilimagisatsinnit ukiunik qulinik utoqqaanerugunarpoq
Qalerallit 70 centimeterinik angissusillit qulit-aqqaneq-marluk missaanni ukioqartut siornatigut eqqoriarneqartarsimavoq, periutsilli nutaat atorlugit misissuisoqarmat paasineqarpoq qalerallit taama angissusillit 20-t sinnerlugit ukioqartut, immaqaluunniit suli ukioqqortunerusut.
Qalerallit sissii kisillugit qanoq ukioqqortutiginersut ilisimatuut paasiniartaraluarpaat, periaaserli taanna naammanngitsoq ilisimatuut nunanit tamaneersut maanna paasivaat.
- Qalerallit sissii kisillugit qanoq ukioqqortutiginersut naatsorsussallugu ajornakusoornerpaavoq, taama naatsorsuiniartarnerput eqqortuunersoq sivisuumik nalornissutigisimavarput, Norgemi immamik ilisimatusarfimmi ilisimatooq Ole Thomas Albert oqarpoq.
Qalerallit utoqqaassusilertarnerat pillugu ilisimatuut qanittukkut ataatsimiipput, qalerallillu utoqqaassusilerniartarneranni periutsit assigiinngitsut atorlugit sulisarnertik ilanngullugu oqaluuseraat.
Sorsunnermik nillertumik taaneqartartup nalaani atomip nukinga atorlugu misileraalluni qaartiterisoqarmat qinngualanerit radioaktiviusut pinngortut atorlugit qalerallit utoqqaassusaat siornatigut naatsorsorneqartaraluarpoq.
Qinngualanerit radioaktiviusut Ruslandip avannaatungaani qaleralinnut sunniussimapput, qalerallillu sissiini qinngualanerit radiokativiusut qanoq annertutiginerat paasigaanni qalerallit qanoq utoqqaatiginersut naatsorsinnaasarsimavaat
Ilisimatuut Ruslandimeersut, USA-meersut, Canadameersut, Kalaallit Nunaanneersut, Polenimeersut, Spaniameersut, Portugalimeersut Norgemeersullu ataatsimeeqatigiipput.
