Qaleraleeqqat pineqarnerat uparuaatigaa
Nukik Seafoodip qaleralinnik mikivallaartunik nunatta avataanut 600 tonsit angullugit tunisisimanera, Qaqortumilu qaleraleeqqanik eqqaasimaneq piujuaannartitsinissamut naapertuutinngilluinnartut, taamaattumillu aalisarnermut maleruaqqusanik sukaterisoqartariaqartoq Ilulissani borgmesteri Anthon Frederiksen oqarpoq.
-Sinerissap avataani aalisarneq taamatut ingerlanneqaannassappat qaleraleqassutsinut sunniuteqapilussinnaanera ernumassutigisariaqarpoq. Taamaammat sinerissap avataanni qaleralinniarnermi piniutit naleqqussartariaqarsorinarput, taamaalilluni qaleraleeqqanik pisaqartarneq pinaveersimatinniarlugu.
Qaleraleeqqat qallorneqartuarnerata sunniuteqapilunnissaa tamatta takusinnaagipput tamannalu piujuaannartitsinissamik oqalunnermut naapertuutinngilluinnartoq Anthon Frederiksen oqarpoq.
Anthon Frederiksen aamma oqarpoq qaleraleeqqat qanoq amerlatigisut qallorneqarnersut qanorlu amerlatigisut eqqarneqarnersut Naalakkersuisut nassuiaatigisariaqaraat.
