Qalasersuup Issittumilu avatangiisit illersornissaannut EU pingaarutilimmik alloriartoq

Qalasersuup Sikuiuitsullu Avannarliup illersorneqarnissaanut aqqutissiuussisinnaasumik EU-Parlamenti aalajangersaavoq. Aalajangersakkami ilaatigut innersuussutigineqarluni Qalasersuaq eqqaalu illersugaasariaqartut, immatut allanngutsaaliukkatut atuutsilersillugit.

Issittumi mingutsitsisoqannginnissaanik qulakkeerisussamik Issittumi Siunnersuisoqatigiit pisussaaffiliisumik isumaqatigiissusiornissaat pisariaqartinneqartoq, aalajangersakkami aamma erseqqissarneqarpoq.

EU-mi aalajangersagaq nutaaq avatangiisinik illersuiniaqatigiiffiup Greenpeacep ilassilluarpaa.

- Immami eqqissisimatitaqalernissaanik siunnersuutip saniatigut  nunat EU-mut ilaasortat aamma Issittumi Siunnersuisoqatigiit, Issittumi avatangiisinik illersuinialeqqullugit aamma atuipilunnissaq pinnagu illersuinissaq ilungersuutigeqqullugu, EU-Parlamentimit erseqqissumik nalunaarfigineqarput. Uuliasiortitseqatigiiffiit soorlu Shell, Statoil aamma Gazprom uuliaqarsinnaanera kisiat pivaat avatangiisinillu navianartorsiortitsillutik - naak uuliasiornermi ajutoortoqassagaluarpat saliinissamut teknikkikkut periarfissaqanngikkaluartoq.  Issittumi Siunnersuisoqatigiit aqqutigalugit avatangiisini isumannaatsuunissap pitsanngorsarneqarnissaanut Danmark periarfissaqarluaraluarpoq, tamatumanili qallunaat nipaappallaaqaat, Greenpeace-imi apeqqutini issittumut tunngasuni paasisitsiniaanermi pisortaq Birgitte Lesanner oqarpoq.