Qalasersuup eqqissisimatitanngortinneqarnissaa periarfissaavoq
Kalaallit Nunaata Danmarkillu, ukioq 2014 nallertinnagu issittoq pillugu periusissaq Naalagaaffiit Peqatigiiffiannut saqqummiuttussaavaat. Tassani Kalaallit Nunaat ersarissunik pingasunik piumasaqaateqarpoq. Taakkununnga ilaalluni, Qalasersuaq.
Kisianni sumiiffik uuliaqarnanilu gasseqarunanngilaq taamaattumilluuna Qalanersuaq naalagaaffeqatigiit suniarneraat pillugu nunanut allanut tunngasunut ministeri, Lene Espersen, ima oqarpoq.
- Siullermik isumaqarpunga nunarsuarmi sumiiffiit killeqarfeqanngitsut killeqarfilersortariaqartut, taamaalilluta siunissami aaqqiagiinnginnerit pinngitsoortissinnaaniassagatsigit. Qalasersuarmili susoqarnissaa pillugu suli aalajangertoqanngilaq. Qalasersuup allanngutsaaliorneqarnissaa illersorneqarnissaalu siornatigut oqallisigineqarnikuuvoq aammalumi tamanna uagut ammaffigaarput, kisiannili tamanna pitinnagu isumaqatigiissutigineqaqqaartariaqarpoq kiap suna pigineraa, taava tassanngaanniit ataatsimoorussamik atuisoqarsinnaanera aamma isumaqatigiissutigisinnaavarput, Nunanut allanut Ministeri Lene Espersen taama oqarpoq.
Naalakkersuisut siulittaasuata Kuupik Kleistip siornatigut oqaatigereerpaa, Qalasersuaq kikkunnit tamanit pigineqarsinnaasariaqartoq.
- Nalunngisara malillugu, nunarsuatsinni sumiiffiit tamavimmik inunnit tikinneqarsimapput. Unali immikkuullarissuuvoq, Qalasersuaq najugaqarfigineqarnikuunngisaannarsimammat. Eqqarsaat taanna uannut kisimi atuutinngilaq, kisiannili kikkunnut tamanut pisumut taaneqartumut soqutiginnittunut atuuppoq, Kuupik Kleist oqarpoq.
Naalakkersuisut siulittaasuata Kuupik Kleistip nunanullu allanullu Ministerip, naqissuserpaat Qalasersuaq Avannarleq, Qalasersuaq Kujallertuulli nunarsuaq tamakkerlugu malittarisassiuunneqassasoq. Lene Espersinnimiilli eqqaammaqquneqarluni, Qalasersuaq Kujalleq, Qalasersuaq Avannarlermiit assigiinngissuteqarmat. Tassa Qalasersuaq Avannarlermi najugaqartoqarnera eqqaammaqquneqarmat, tamannalu aamma Kuupik Kleistimit tapersersorneqarpoq.
- Isumaqarutta Kalaallit Nunaatta imartaanut imartaq taanna atasoq, taava nunat allat imartaq taanna aqussanngilaat. Tassanilu apeqqutaaginnassaaq namminersortuuneq aningaasaaqarniarnerullu inissisimanera qanoq isikkoqarnersoq. Taakkummi tamarmik oqimaaqatigiipput, Naalakkersuisut siulittaasuat Kuupik Kleist oqarpoq.
Kuupik Kleistittaaq oqaatigaa, Qalasersuaq Avannarliup siunissami immaqa ukiut qulit 15-nillu qaangiuppata nuna eqqissisimasitatut inissinneqarsinnaanissaa takorloorneqarsinnaassasoq.
