Qalasersuup eqqaani orpippassuaqarsimavoq
Qalasersuarmut 800 kilometerisut ungasitsigiinnartup kiattuusimaneranut tamanna takussutissaavoq.
Umimmaat Nunaata avannaarsuani nunami eqqissisimatitami siorna aasakkut nalinginnaanngitsumik nassaartoqarpoq. Orpippassuarmimmi ujaranngornikumik nassaartoqarami. Nuna eqqissisimatitaq Kalaallit Nunaannit 25 kilometerisut ungasitsigaaq Qalasersuarmiillu 800 kilometerisut ungasitsigaluni. Ilisimatusartoq, Joel Barker, amerikamiut ilisimatusarfianit, Ohio State University-meersup, marallummi avalequtinik siorna aasakkut nassaarsimavoq aasaq mannalu uterluni iluamik misissorsimallugit.
Ilisimatusartut avalequtaannarnik nassaanngillat, orpiummi timitaannik ujarannguunnikunik, sorlannik allaallu orpiup pilutaannik nassaartoqarpoq. Nassaat taakku 2 millionit 8 millionillu akornanni pisoqaassuseqartut ilimagineqarpoq.
Tusagassiutinut nalunaarummini Joel Barker oqarpoq orpippassuarnik ujarannguunnikunik siullermik nassaartoqareernikuusoq, nassaalli uuma immikkoorutigigaa aatsaat taama avannarpasitsigisumi nassaartoqarmat. Ukiorpassuit matuma siorna Qalasersuup eqqaani orpippassuaqarsimaneranik uppernarsaatissaqalerpoq. Silaannaq ukiut 11 millionit matuma siorna nillertikkiartulermat, naasut orpiillu maanna nassaarineqartut silap pissusaata allanngornera siulliullutik malugisimavaat. Piluttallu allaat innarlerneqarsimanngimmata qanoq sukkatigisumik silap pissusaa allanngorsimanersoq qanorlu naasut orpiillu allanngornermut taassumunnga qisuariarsimanersut paasiniarnissaannut periarfissippaatigut, Joel Barker oqarpoq.
San Franciscomi ataatsimeersuarnermi Joel Barkerip ilisimatusarnerminit paasisani ullumi saqqummiutissavai.
