Qalasersuup avannarliup eqqissitinnissaa Søvndal-ip ajattunngilaa
2014-mi FNip isummerfigissavaa issittumi nunat Qalasersuarmut avannarlermut oqartussaalerumasut qanoq pineqanissaat. Qalasersuarmut oqartussaalerusuttut ilagaat Danmarkimi naalagaaffeqatigiit.
Siornatigut nunanut allanut ministerip Lene Espersenip saqqummiunnikuuvaa Issittumi Iliuusissatut pilersaarut aqqutigalugu Qalasersuup avannarliup eqqissisimatinneqalernissaa. Kingoraartaatalu Villy Søvndalip tumit taakku maanna atuallappai.
- Isumaqarpunga tamanna isumaliutigineqarsinnaalluartoq. Taamaattoq tamanna pillugu aalangersimasumik maanna isummerusunngikkallarpunga, Søvndal oqarpoq.
Qalasersuup avannarliup eqqissisimatinneqalernissaanik isuma nutaajunngilaq. Naalakkersuisut siulittaasuata Kuupik Kleistip arlaleriarluni saqqummiuttareerpaa Qalasersuup avannarliup inunnit atorneqarani eqqissisimatinneqarnissaanik isuma.
Nunanulli allanut ministerip erseqqissarpaa killeqarfiit inissinneqareerpata tamanna uterfigineqarsinnaasoq.
- Nunavimmut sorlermut attaveqarnera qiviaraanni taava naalagaaffeqatigiittut Qalasersuaq avannarleq oqartussaaffigilerumasinnaavarput. Aammali qularutiginngilara taamatut russit eqqarsarlutik Qalasersuarmut oqartussaalerumassasut. Kisianni pitsaaqutaa tassa nunat tamalaat malittarisassaat malillugu tamanna iluarsineqassammat, Villy Søvndal oqarpoq.
Qalasersuup avannarliup oqartussaaffigilernissaa aningaasatigut naleqanngilaq tassungali oqartussaanerup ilisimaneqarnissaa pingaartinneqarluinnarpoq.
Danmarkilu tassunga oqartussaatinneqalissappat pinngortitarsuup tamatuma eqqissisimatinneqalernissaa eqqartorneqarsinnaasoq ministeri oqarpoq.
- Naalagaaffeqatigiit aalajangiisutut isumaqarfigisaat aalajangersarneqareerput, nunallu iluaniittuusinnaasut suut tunngavigalugit piumanerivut aalajangersoreerlugit. Tamakku kingorna aamma oqaluuserineqarsinnaalluarpoq nunarsuaq tamaat kingornussisussanngorlugut aaqqiineq, Villy Søvndal oqarpoq.
